Úkimet apparaty «Taza Qazaqstan» ekologııalyq bastamasy aıasynda senbilikke qatysty
ASTANA. KAZINFORM — Premer-mınıstr Oljas Bektenov bastaǵan Úkimet apparatynyń qyzmetkerleri Memleket basshysy jarııalaǵan «Taza Qazaqstan» ekologııalyq bastamasy aıasynda senbilikke qatysty.
Úkimettiń baspasóz qyzmeti habarlaǵandaı, jalpy aýdany 68,5 myń sharshy metrden asatyn EXPO saıabaq aımaǵynyń aýmaǵynda qaraǵaı, qaıyń jáne basqa da aǵash túrleriniń kóshetteri otyrǵyzyldy. Kórme alańyn kógaldandyrý jumystarynyń nátıjesinde jalpy kólemi 9,2 myń aǵash, 25,5 myń kópjyldyq buta otyrǵyzylǵan.
«Taza Qazaqstan» aıasynda «Búkil qazaqstandyq aǵash egý kúni» ekologııalyq aktsııasy ótýde. Bir apta ishinde barlyq óńirlerde 200-ge jýyq ekologııalyq is-shara ótti.
Qoǵamdyq keńistikterdi tazartý jáne aǵash otyrǵyzý boıynsha aktsııalar uıymdastyryldy, 5 myńnan astam tarıhı-mádenı mura nysandary retke keltirildi, ózender, kólder jáne basqa da sý aıdyndarynyń aınalasyndaǵy 5,8 mln sharshy metrden astam aýmaq tazartyldy.
Jalpy bıyl ekologııa jáne tabıǵı resýrstar mınıstrligi óńirlerge 300 myńnan astam kóshet jiberdi. 2024 jyly qalalyq orta men ekologııa salasyndaǵy máselelerdi sheshýge ótinim berýdi jeńildetý úshin @TazaQazBot chat-boty jumys isteıdi.
«Taza Qazaqstan» bastamasy iske qosylǵan sátten bastap oǵan 6 mln-nan astam adam qatysty. Bir jyl ishinde shamamen 1,6 mln jasyl jelek otyrǵyzylyp, 5,8 mln sharshy metrden astam jaǵalaý aımaqtary retke keltirildi, 1,1 mln tonna qoqys jınaldy.
Osyǵan deıin elordalyq jas tennısshiler «Taza Qazaqstan» aktsııasyna qoldaý bildirgenin jazdyq.