Úkimet ana men bala ólimin azaıtý sharalaryn talqylaıdy
ASTANA. KAZINFORM – Búgin saǵat 10:00-de Úkimet úıinde Úkimet otyrysy ótedi. Onda Mınıstrler kabınetiniń músheleri 2 máseleni talqyǵa salady.
Naqtyraq aıtqanda otyrystyń kún tártibine mynadaı 2 másele shyǵarylyp otyr:
- Saýda salasyn tsıfrlyq transformatsııalaý barysy men damý bolashaǵy;
- Ana men bala ólimin azaıtý baǵytynda qabyldanyp jatqan sharalar.
Birinshi másele boıynsha Saýda jáne ıntegratsııa mınıstri Arman Shaqqalıev negizgi baıandama jasap, saýda salasyn tsıfrlandyrý, oǵan engizilip jatqan jasandy ıntellekt sheshimder jaıyna toqtalady. Sondaı-aq mınıstr «Ulttyq taýarlar katalogy» men «Elektrondyq taýarlar katalogyn» engizý jumystarynyń qarqynyna qatysty málimettermen bólisedi.
Munan bólek, Arman Abaıuly taýarlardy sertıfıkattaý boıynsha ótken jyly iske qosylǵan Tehnıkalyq retteýdiń aqparattyq júıesine (E-KTRM) ózgerister men qorytyndylardy usynady.
Densaýlyq saqtaý mınıstri Aqmaral Álnazarova elimizde ana men bala ólim-jitimin tómendetýge baǵyttalǵan sharalar jaıyna toqtalady. Qolǵa alynǵan jumystardyń nátıjesinde ótken jyly ana ólimi - 12, bala ólimi - 11, al osy jyldyń alty aıynda ana ólimi - 10, bala ólimi 26 paıyzǵa tómendegenin aıtady. Sonymen qatar mınıstr ana men bala ólimin tómendetýge baǵyttalǵan sharalarǵa toqtalyp, erekshe mán beriletin máselelerdi ataıdy.
Otyrys qorytyndysy boıynsha ótetin baspasóz konferentsııasynda:
- Saýda jáne ıntegratsııa mınıstri Arman Shaqqalıev,
- Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Dmıtrıı Mýn BAQ ókilderi tarapynan týyndaıtyn saýaldarǵa jaýap beredi.
Aıta keteıik, ótken aptada, 29 shildede ótken Úkimet otyrysynda eńbek naryǵyn damytý jáne tsıfrlandyrý máselesi talqylanǵan edi. Sol kezde Eńbek jáne halyqty áleýmettik qorǵaý vıtse-mınıstri Asqar Bıahmetov orta merzimdi kezeńge kadrlarǵa boljamdy qajettilik 3 mıllıon adamǵa jýyq ekenin aıtty.
- Bizdiń aldymyzda 2029 jylǵa deıin 3,3 mıllıon azamatty jumysqa ornalastyrý mindeti tur. Jyl basynan beri 250 myńnan astam adam jumysqa ornalasty, onyń ishinde 38 paıyzy jastar (95,4 myń adam), — dedi vıtse-mınıstr.
Al Ónerkásip jáne qurylys vıtse-mınıstri Iran Sharhan bıznes-protsesterdi avtomattandyrýǵa baılanysty 40-tan astam mamandyq ózgeriske ushyraǵanyn, bıyl 190 ınvestıtsııalyq jobany iske qosý barysynda mashına jasaýda taǵy 8 jańa mamandyq paıda bolǵanyn atap ótti.
- Olardyń qatarynda 3D basyp shyǵarý jáne dánekerleý ınjeneri, robottandyrylǵan júıelerdiń operatory bar. Osylaısha qol eńbeginiń avtomattandyrylǵan eńbek túrimen birtindep aýysýy baıqalýda. Bul qoǵamdaǵy jumysshy mamandyqtar týraly túsinikti túbegeıli ózgertýge múmkindik beredi, — dedi ol.
Tsıfrlyq damý, ınnovatsııalar jáne aeroǵarysh ónerkásibi birinshi vıtse-mınıstri Qanysh Tóleýshın zeınetaqy rásimdeý protsesin tsıfrlandyrý boıynsha pılottyq joba nátıjeleri týraly aıtyp berdi.
- Búginde pılottyq rejımde prıntsıpti jańa tásil engizildi. Jasy boıynsha skorıng negizinde júıe zeınetaqy isin avtomatty túrde qalyptastyrady, eńbek ótili týraly málimetterdi tekseredi jáne azamat tarapynan ótinish jasamaı-aq tólemderdi proaktıvti taǵaıyndaıdy, — Qanysh Tóleýshın.
Otyrysty qorytyndylaǵan Premer-mınıstr Oljas Bektenov sheteldik jáne otandyq ınvestorlardyń jańa jumys oryndaryn qurý boıynsha mindettemelerin oryndaý baǵytyndaǵy jaýapkershiligin arttyrý, sondaı-aq ınvestıtsııa kóleminiń eń kemi 30 paıyzyn quraıtyn eńbekaqy tóleý qoryn qalyptastyrý talabyn saqtaý qajettigin atap ótti. Munan bólek, jańa jumys oryndaryna naqty ýaqyt rejıminde tolyq ári júıeli túrde monıtorıng júrgizý úshin biryńǵaı aqparattyq júıe qajettigine, atalǵan júıe elimizde iske asyrylyp jatqan jobalar týraly barlyq aqparatty, sonyń ishinde biliktilik deńgeıin, eńbek jaǵdaılaryn, jalaqy mólsherin jáne basqa da derekterdi qadaǵalap otyrýy tıistigine nazar aýdartty. Osyǵan oraı Úkimet basshysy ortalyq jáne jergilikti atqarýshy organdarǵa mynadaı tapsyrmalar berdi:
- Eńbek jáne halyqty áleýmettik qorǵaý mınıstrligi oblys ákimderimen birlesip, óńirlik jumyspen qamtý kartalarynda kózdelgen eńbek naryǵynyń negizgi kórsetkishteriniń oryndalýyn qamtamasyz etýi;
- óńir ákimderi turaqty jumys oryndaryn qurýǵa basa nazar aýdara otyryp, jumyspen qamtý josparlarynyń oryndalýyn jeke baqylaýǵa alýy;
- Ulttyq ekonomıka mınıstrligi salalyq memlekettik organdarmen jáne óńir ákimdikterimen birlesip, osy jyldyń 1-shi qyrkúıegine deıin 2025-2027 jyldary iske asyrylatyn jobalar boıynsha barlyq derekterdi memlekettik josparlaýdyń aqparattyq júıesinde ornalastyrýdy qamtamasyz etýi.
- kelesi jyldyń basynan bastap halyqty jumyspen qamtýdy keńeıtýge baǵyttalǵan aýdan jáne qala ákimderiniń KPI júıesin engizýi;
- Tsıfrlyq damý, ınnovatsııalar jáne aeroǵarysh ónerkásibi mınıstrligi jyl sońyna deıin memlekettik organdar men bıznestiń derekterin biriktirip, jańa jumys oryndaryn qurý boıynsha biryńǵaı tsıfrlyq júıeni qalyptastyrýy tıis.
Úkimet otyrysynyń tikeleı taratylymy PrimeMinister.kz saıtynda, YouTube resmı arnasynda, Facebook áleýmettik jelisinde, sondaı-aq UKIMET Telegram-kanalynda kórsetiledi. Al baspasóz konferentsııasynyń tikeleı taratylymy YouTube resmı arnasynda jáne Facebook áleýmettik jelisinde júredi.