Úkimet alıment qoryn qurýdan bas tartyp otyr - depýtat

ASTANA. KAZINFORM – Májilis depýtaty Magerram Magerramov sot oryndaýshylardyń qyzmetin jetildirýge arnalǵan Úkimet saǵatynda Ádilet mınıstri Erlan Sársembaevtyń suraqtarǵa aıtqan ýájine túzetý engizdi.

- Biz ózge elderdiń tájirıbesi boıynsha Memlekettik alıment qoryn qurýdy usyndyq. Biraq bul ıdeıany Úkimet qoldamaı otyr jáne búgingi kúnge deıin iske asyrmaı keledi. Bul jerde Ádilet mınıstriniń ýájin túzete ketkim keledi. Ondaı qor qurý bıýdjetke salmaq túsirmeıdi. Óıtkeni qorǵa salynatyn aqsha salyqqa jatpaıtyn túsimderden alynady. Ekinshiden, alıment qory jatypisherlik pıǵyldar týyndatpaıdy. Óıtkeni memleket alıment boryshy bar azamattan bereshekti keshiktirip bolsa da qazynaǵa óndirip alady, - dedi ol.

Depýtattyń sózinshe, memleket, kerisinshe, qazirgi jaǵdaıda alıment óndirý isin qaraýǵa júıeli túrde qomaqty soma tólep otyr.

- Onyń syrtynda kirisi bar boryshkerlerden toqsan saıyn 1 aılyq eseptik kórsetkish (3932 teńge – red.) kóleminde qosymsha tólem alynyp otyr. Osynyń aıasynda mundaı shyǵyndardy eskere otyryp, memleket áli kúnge deıin alıment qoryn qurýdan nege bas tartyp otyrǵany tań qaldyrady. Óıtkeni, bul qarajattyń bir bóligin osyndaı qorǵa qaıta bólý qısyndy jáne tıimdi bolar edi - bul balalarǵa turaqty jáne ýaqytyly tólemderdi qamtamasyz etedi. Bıýdjetti utymdy jáne oılastyrylǵan josparlaý - bul týraly biz Úkimetke únemi aıtyp kele jatyrmyz, - dedi Magerram Magerramov.

Osy jıynda shaǵyn nesıesin ótemegen azamattardyń 2,5 mln qujaty jeke sot oryndaýshylardyń qolynda júrgeni málim boldy.