Úkimet áleýmettik masyldyqpen kúresti jalǵastyrady

ASTANA. KAZINFORM — Premer-mınıstr Oljas Bektenov eńbekke qabiletti árbir azamat jumys istep, memleketke masyl bolmaýy kerektigin eske saldy.

— Áleýmettik masyldyq pen áleýmettik alaıaqtyq faktileri bar. Qazir bul tutas bir ındýstrııaǵa aınalǵan. Internetti qarasańyz, «mynadaı jaǵdaı boıynsha memleketten eń joǵary járdemaqy alyp berýge kómektesemin» degen jarnamalar júr, — dedi Oljas Bektenov Úkimet úıinde ótip jatqan baspasóz máslıhatynda.

Osy oraıda Premer-mınıstr qazir árbir jaǵdaı jeke qaralyp jatqanyn aıtyp, jónsiz áleýmettik kómekke tosqaýyl qoıylatynyn jetkizdi.

— Áleýmettik kómek tek óz-ózin qamtamasyz ete almaıtyn azamattarǵa kórsetilýi kerek, bul basty qaǵıda. Eger adam eńbekke qabiletti bolsa, ol jumys isteýi kerek. Biz naryqtyq ekonomıkada ómir súrip jatyrmyz, halyqqa ashyq aıtyp, osy saıasatty alǵa jyljytýymyz qajet, — dep túsindirdi Úkimet basshysy.

Buǵan deıin Úkimet basshysy Oljas Bektenov ákimder men mınıstrlerdi nege ashyq synǵa almaıdy degen saýalǵa jaýap berdi. 

Aıta ketsek, búgin Úkimet otyrysynda Oljas Bektenov Ónerkásip jáne qurylys mınıstri Ersaıyn Naǵaspaevty synǵa alyp, tapsyrma berdi.