Úkimet aldaǵy 3 jylda Ulttyq qordan 6 trln teńge almaqshy
ASTANA. KAZINFORM – Ulttyq qordan aldaǵy 3 jylda respýblıkalyq bıýdjetke alynatyn transferttiń kólemin aıqyndaıtyn zań jobasy ashyq talqylaýǵa shyǵaryldy.
«Qazaqstan Respýblıkasynyń Ulttyq qorynan 2025-2027 jyldarǵa arnalǵan respýblıkalyq bıýdjetke kepildendirilgen transferttiń mynadaı mólsherleri bekitilsin:
2025 jyl – 2 000 000 000 myń teńge;
2026 jyl – 2 000 000 000 myń teńge;
2027 jyl – 2 000 000 000 myń teńge», - dep jazylǵan qujatta.
Zań jobasynda transferttiń bul mólsheri aldaǵy úsh jyldaǵy munaıdyń halyqaralyq naryqtaǵy boljamdy baǵasyna sáıkes eseptelgeni aıtylǵan.
«Ulttyq qorǵa munaı sektory uıymdarynan túsetin túsimder boıynsha munaıdyń 2025-2027 jyldarǵa arnalǵan kesimdi baǵasynyń mynadaı mólsherleri belgilensin:
2025 jyl – bir barrel úshin 42,3 AQSh dollary;
2026 jyl – bir barrel úshin 41,0 AQSh dollary;
2027 jyl – bir barrel úshin 39,4 AQSh dollary», - delingen zań jobasynda.
Qujat 16 shildege deıin ashyq talqylaýda bolyp, keıin Májiliske joldanady. Premer-mınıstr Oljas Bektenovtiń osy qujat týraly Májiliske daıyndaǵan túsindirme jazbasynda Ulttyq qordan aldaǵy 3 jylda alynatyn transfertter munaı sektory uıymdarynan Ulttyq qorǵa boljanatyn túsimderdiń kóleminen aspaıtyny aıtylǵan.
«Kesimdi baǵa kezinde munaı sektory uıymdarynan Qazaqstan Respýblıkasynyń Ulttyq qoryna túsetin túsimder 2025 jyly 2 277,0 mlrd teńge, 2026 jyly 2 276,8 mlrd teńge, 2027 jyly 2 277,0 mlrd teńge mólsherinde boljanady», - dep jazady O.Bektenov.
