Úkimet Alakól jaǵalaýyn qorǵaıtyn bóget salýǵa 3 mlrd teńge bóldi
ASTANA. KAZINFORM — Memleket basshysynyń sý sharýashylyǵy ınfraqurylymyn damytý jónindegi tapsyrmalaryn oryndaý aıasynda Jetisý oblysy Alakól kóli jaǵalaýyn qorǵaıtyn bóget salý jobasyn júzege asyrýǵa Úkimet rezervinen 3 mlrd teńge bólindi.
Tıisti qaýlyǵa QR Premer-mınıstri Oljas Bektenov qol qoıdy.
Bólingen qarajat uzyndyǵy 6 shaqyrym qorǵanys bógetin salýǵa baǵyttalady, onyń 2,5 shaqyrymy Kóktuma aýylyna, 3,5 shaqyrymy Aqshı aýylyna tıesili.
Buǵan deıin 2025 jyly 1,7 shaqyrym ýchaskede nyǵaıtý, jer qazý, beton quıý jumystary júrgizilip, gabıon qurylymdaryn ornatý jumystary aıaqtaldy. Jalpy alǵanda, qurylys-montajdaý jumystarynyń shamamen 25%-y oryndaldy.
Jobanyń júzege asyrylýy Alakól jaǵalaýynyń odan ári shaıylýynyń aldyn alyp, kóldegi shógindilerdiń tabıǵı tasymaldanýy men qaıta bóliný júıesin saqtaýǵa múmkindik beredi.
Qorǵanys ınfraqurylymyn qalyptastyrý óńirdiń týrıstik áleýetin damytýǵa jáne demalýshylar men jergilikti turǵyndar úshin jaǵdaı jasaýǵa yqpal etedi.
Sońǵy eki jyl ishinde Aqmola, Aqtóbe, Batys Qazaqstan, Qostanaı Soltústik Qazaqstan jáne Pavlodar sııaqty alty óńirde jalpy uzyndyǵy 243 shaqyrym bolatyn qorǵanys bógetteri men qurylystary salynyp, nyǵaıtyldy.
Úkimet sý jáne týrıstik ınfraqurylymdy damytýǵa, tabıǵı resýrstardy saqtaýǵa jáne óńirlerdiń ornyqty áleýmettik-ekonomıkalyq damýyn qamtamasyz etýge baǵyttalǵan jobalardyń júzege asyrylýyn turaqty baqylaýda ustap otyr.
Aıta ketelik Alakól men Qapshaǵaıdaǵy qaýipsizdikti jasandy ıntellekt baqylaıtyny týraly jazǵan edik.
