Úkimet Aqtaý bý-gaz qondyrǵysyn salý jónindegi kelisimge qol qoıýdy maquldady
ASTANA.KAZINFORM - Úkimet Memleket basshysy Qasym-Jomart Toqaev bergen tapsyrmalardy júzege asyrý aıasynda Aqtaý qalasynda qýaty 160 MVt bolatyn bý-gaz qondyrǵysyn salý jónindegi QR Energetıka mınıstrligi men «Aqtaý energetıka kompanııasy» JShS arasynda jasalatyn ınvestıtsııalyq kelisimge qol qoıýdy maquldady. Tıisti qaýlyǵa Premer-mınıstr Oljas Bektenov qol qoıdy.
Úkimettiń baspasóz qyzmeti málimetinshe, Aqtaý energetıka kompanııasy 2024 jyly Qytaıdyń elektr energııasyn óndiretin bes iri ulttyq kompanııasynyń qataryna kiretin memlekettik China Huadian Corporation Ltd. korporatsııasymen birlesip qurylǵan.
Jobanyń jalpy ınvestıtsııa kólemi shamamen 108 mlrd teńge. Onyń 70%-yn qytaılyq ınvestor, al 30%-yn qazaqstandyq tarap qamtamasyz etedi. «MAEK» JShS alańynda salynatyn bý-gaz qondyrǵysyn paıdalanýǵa berý 2027 jyldyń maýsymyna josparlanǵan.
Kelisim sharttaryna sáıkes, ınvestor qazaqstandyq mamandar úshin 300-den astam jańa jumys ornyn ashýǵa mindetteledi. Sonymen qatar «Elektr energetıkasy» mamandyǵy boıynsha qyzmetkerlerdi Qytaıdyń salalyq joǵary oqý oryndarynda magıstratýrada oqytýǵa jyl saıyn granttar berý qarastyrylǵan. Budan bólek, qazaqstandyq kadrlardyń biliktiligin arttyrýǵa baǵyttalǵan baǵdarlamalardy júzege asyrý jáne úzdiksiz bilim berý júıesin engizý josparlanyp otyr.
Kelisim merzimi aıaqtalǵannan keıin bý-gaz qondyrǵysy «MAEK» JShS teńgerimine óteýsiz beriledi.
Esterińizge sala keteıik, buǵan deıin Aqtaý energetıka kompanııasy «MAEK» JShS-niń qoldanystaǵy qýattaryn keńeıtý jumystaryn bastaǵan bolatyn.
Jalpy, ınvestıtsııalar qýat tapshylyǵyn toltyrýdy qamtamasyz etýge, óńirdi elektrmen jabdyqtaý senimdiligin arttyrýǵa jáne tutastaı alǵanda eldiń energııa júıesiniń turaqtylyǵyn nyǵaıtýǵa múmkindik beredi.
Buǵan deıin Qyzylordada 240 megavattyq bý-gaz qondyrǵysynyń qurylysy týraly jazǵan edik.
