Úkimet AQSh-tyń sanktsııalyq tizimine engen kompanııany zerttep jatyr

ASTANA. KAZINFORM – Qazaqstan Úkimeti Reseıge joǵary tehnologııalyq jabdyqty jetkizýge qatysqany úshin AQSh-tyń sanktsııalyq tizimine engen «KBR- Tehnologıı» kompanııasy jaıynda habardar emestigin jarııalady.

«Memlekettik kirister komıteti men Ónerkásip mınıstrliginiń málimetinshe, bul kompanııa eksport-ımport lıtsenzııasyn alýǵa ótinish bermegen. Bizde kompanııanyń profılin jasaıtyn basym ónimderdiń tizimi bar. Buǵan deıin atalǵan kompanııa Qazaqstanǵa osy sanattaǵy taýarlardy ımporttamaǵan nemese eksporttamaǵandyqtan, oǵan qatysty tıisti profıl jasalmaǵan. Sondyqtan qazir biz ony anyqtap jatyrmyz», - dedi vıtse-premer Serik Jumanǵarın Senattyń jalpy otyrysynan keıin tilshiler suraǵyna jaýap bere otyryp.

Onyń aıtýynsha, qazir bul másele pysyqtalyp jatyr.

«Tıisti tizimge engen taýarlardy qatań qadaǵalaımyz. Biz sanktsııany qoldamaımyz, biraq ony oryndaýǵa májbúrmiz. Osy turǵyda eksporttyq-ımporttyq baqylaýǵa jatatyn tizimdi keńeıttik. Kompanııa keńeıtilgen tizimnen taýar jetkizgen joq. Sondyqtan olar neni jetkizgenin, zań buzý deregi qalaı tirkelgenin anyqtap jatyrmyz. Kelesi aptada Eýropa odaǵynyń arnaıy ókili O’Sallıvan myrza keledi. Onymen seısenbi kúni kezdesip, osy máselelerdi talqylaımyz», - dedi Serik Jumanǵarın.

Eske sala keteıik, jaqynda AQSh Qarjy mınıstrligi Reseıge qarsy sanktsııalardyń jańa paketin engizetinin jarııalady.

Bul tizimge Máskeý bırjasy men onyń enshiles kompanııalary engen.