Úkimet ákimdiktermen birge sý tasqynyna qarsy sharalardy sapaly júzege asyrýǵa tıis - Toqaev

ASTANA. KAZINFORM — Úkimet ákimdiktermen birge sý tasqynyna qarsy sharalardy sapaly júzege asyrýǵa tıis. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.

- Quzyrly mekemeler bıyl keıbir aımaqta aldymen sý tasqyny, sodan soń qurǵaqshylyq bolatynyn aıtýda. Úkimet qazirdiń ózinde naqty is-qımyl josparyn ázirlep qoıýy kerek.Taǵy da aıtarym, tabıǵı apattardy boljaý úshin tsıfrlyq tásilderdi paıdalanbasaq, jumystyń bári bosqa ketedi. Bizde qajetti tehnologııanyń bárin paıdalanýǵa múmkindik bar. Tek sonyń barlyǵy qanshalyqty jaýapty ári júıeli túrde qoldanylady degen suraq týady. Másele – sonda, - dedi Prezıdent.

Memleket basshysynyń paıymynsha, egis alqaptary men ınfraqurylymdy qorǵaýǵa qajetti sharalar aldyn ala qabyldanýy qajet.

- Ár joly másele paıda bolǵan kezde ǵana jantalaspaı, qıyndyqtyń aldyn alǵan jón. Burynǵy qatelikterge jol bermeý kerek. Kóktem de kelip qaldy. Úkimet ákimdiktermen birge sý tasqynyna qarsy sharalardy sapaly júzege asyrýǵa tıis, - dedi Qasym-Jomart Toqaev.

Buǵan deıin Prezıdent memleket jeke kapıtal rólin ózine alýdan bas tartýy qajettigin aıtqan edi.