Úkimet agroónerkásip keshenin damytý úshin jańa tásilder engizip jatyr
ASTANA. KAZINFORM — Úkimette QR Premer-Mınıstri Álıhan Smaıylovtyń tóraǵalyǵymen ótken keńes qorytyndysy boıynsha tıisti qujat bekitildi.
Memleket basshysy Qasym-Jomart Toqaev 5 jyl ishinde aýyl sharýashylyǵy salasyn damytýdyń jańa deńgeıine shyǵarý jáne jalpy ónim kólemin 2 esege arttyrý jóninde naqty mindetter qoıdy.
Osy maqsatta agroónerkásip kesheniniń árbir baǵyty boıynsha sharalar qarastyrylǵan Jol kartasy ázirlendi.
Máselen, respýblıkada egis alqaptaryn ártaraptandyrý jandandyrylady, bul ylǵaldy kóp qajet etetin daqyldardyń úlesin azaıtady jáne joǵary rentabeldi ósimdikter, mysaly, maıly daqyldar óndirisiniń kólemin arttyrady.
Sonymen qatar sý únemdeý tehnologııalaryn engizý, tyńaıtqyshtardy qoldaný deńgeıin arttyrý jáne aýyl sharýashylyǵy tehnıkasyn qarqyndy jańartý josparlanǵan.
Sondaı-aq Jol kartasyna iri jáne usaq mal basyn kóbeıtýge, et pen astyq óńdeýdi arttyrýǵa, sút-taýarly fermalardy jáne basqa da nysandardy iske qosýǵa baǵyttalǵan sharalar da engizilgen.
Jol kartasyn júzege asyrý agroónerkásip kesheniniń jalpy ónimin 2028 jylǵa qaraı 2 esege arttyryp, 17 trln teńgege deıin jetkizýge múmkindik beredi.
Premer-Mınıstr alǵa qoıylǵan mindetterge qol jetkizý úshin Aýyl sharýashylyǵy jáne Sý resýrstary mınıstrlikteri óńirlerdiń ákimdikterimen birlesip, jumys isteý tásilderin qaıta qaraý qajet ekenin basa aıtty.
«Ákimdikter men mınıstrlikter tarapynan atalǵan kórsetkishterge qol jetkizýge turaqty baqylaý ornatý qajet. Búginde biz jumysymyzda jańa tásilder qabyldap jatyrmyz. Oblys ákimdikteri Jol kartasynda kózdelgen óz kórsetkishteriniń oryndalýyn qamtamasyz etýi kerek. Bul úshin jeke jaýapkershilik artylady», — dedi Premer-Mınıstr.
