Úkimet adam papıllomasy vırýsyna qarsy vaktsına satyp alýǵa 9,7 mlrd teńgeden astam qarjy bóldi

ASTANA. KAZINFORM - Úkimet adam papıllomasy vırýsyna (APV) qarsy vaktsına satyp alýǵa jáne Qazaqstanda atalǵan ekpe jumysyn júrgizýge rezervten qarajat bóldi. Tıisti qaýlyǵa QR Premer-Mınıstri Oljas Bektenov qol qoıdy, dep habarlaıdy Úkimettiń resmı saıty.

Ondaǵy málimetterge qaraǵanda, oblystardyń, respýblıkalyq mańyzy bar qalalardyń jáne astananyń bıýdjetterine 351 myńnan astam dozasy mólsherinde vaktsına satyp alý úshin aǵymdaǵy nysanaly transfertter túrinde 9,7 mlrd teńgeden astam qarajat aýdarylady.

Adam papıllomasy vırýsynan týyndaǵan jatyr moıny obyry (JMO) – álemdegi eń kóp taralǵan qaterli isikterdiń biri, ol anyqtalǵan barlyq jaǵdaıdyń qurylymynda 13,1%-ǵa deıin kezdesedi. Jyl saıyn odan 300 myńǵa jýyq áıel kóz jumady. Qazaqstanda JMO barlyq jastaǵy áıelder arasynda qaterli isiktiń basqa túrleri ishinde taralýy boıynsha ekinshi orynda tur. Jyl saıyn respýblıka boıynsha 1900-ge jýyq jańa jaǵdaı tirkeledi, 600-den astam áıel osy patologııadan qaıtys bolady.

APV-na qarsy jáne JMO damýymen kúresýdiń jalǵyz ádisi – vaktsınatsııa. QR Ulttyq vaktsınatsııa kúntizbesine sáıkes jáne DDU usynymyn eskere otyryp, APV-ǵa qarsy ekpe salý 11 jastaǵy qyzdarǵa 6 aı aralyq merzimmen eki ret júrgiziletin bolady. Bul rette Qazaqstanda APV-nyń neǵurlym onkogendi túrlerinen (6, 11, 16, 18) qorǵaıtyn tórt valentti vaktsına qoldanylady.