Úkimet 7 sáýirge deıin jańa Konstıtýtsııany ilgeriletý josparyn bekitedi

ASTANA. KAZINFORM – Úkimet 7 sáýirge deıin jańa Konstıtýtsııany ilgeriletý josparyn bekitedi. Bul týraly Úkimet otyrysynda Premer-mınıstr Oljas Bektenov aıtty.

– Jalpy birqatar zań men zańnamalyq aktilerdi jańa Konstıtýtsııaǵa sáıkes keltirý qajet bolady. Bul týraly Ádilet mınıstri tolyq baıandady, usynystaryn qoldaımyn. Úkimet tarapynan «Qazaqstan Respýblıkasynyń ákimshilik-aýmaqtyq qurylysy týraly» jáne «Qazaqstan Respýblıkasy astanasynyń mártebesi týraly» jańa Konstıtýtsııalyq zańdardyń qabyldanýyn qamtamasyz etý qajet. Ulttyq ekonomıka mınıstrligine múddeli memlekettik organdarmen birge 15 sáýirge deıin konstıtýtsııalyq zańdardyń jobalaryn ázirlep, Úkimetke engizýdi tapsyramyn, - dedi ol.

Premer-mınıstrdiń aıtýynsha, Konstıtýtsııaǵa sáıkes, keıbir óńirlerdiń jedel ekonomıkalyq damýyn qamtamasyz etý úshin «qarqyndy damıtyn qala» arnaýly quqyqtyq rejımi belgilenýi múmkin. Osyǵan baılanysty Parlamentte «Alataý qalasynyń arnaýly mártebesi týraly» Konstıtýtsııalyq zań jobasyn qaraýdy jedeldetip, Memleket basshysyna naýryz aıynyń sońyna deıin qol qoıýǵa usyný qajet.

– Prezıdent «Qazaqstan Respýblıkasynyń Konstıtýtsııasyn iske asyrý jónindegi sharalar týraly» Jarlyqqa qol qoıdy. 7 sáýirge deıin jańa Konstıtýtsııany ilgeriletý josparyn bekitýimiz kerek. Ádilet mınıstrligine múddeli memlekettik organdarmen birge jospar jobasyn ázirlep, 1-shi sáýirge deıin Úkimet Apparatyna engizýdi tapsyramyn. Barlyq ortalyq jáne jergilikti memlekettik organdar men kvazımemlekettik sektor jospardy iske asyrý boıynsha jan-jaqty ári túbegeıli sharalardy qabyldasyn, - dedi Oljas Bektenov.

Aıta keteıik, Úkimette jańa Konstıtýtsııa normalaryn júzege asyrý joldary talqylandy.