Úkimet 5 jyldyq Jasandy ıntellektti damytý tujyrymdamasyn qabyldady
ASTANA. KAZINFORM – 2029 jylǵa qaraı jasandy ıntellektti qoldanyp jasalǵan ónimder 5 ese ósýi kerek. Bilim berý baǵdarlamalarynyń nemese jasandy ıntellekt pánderdiń úlesi artýy kerek. Bul týraly Premer-Mınıstr Oljas Bektenov Úkimet otyrysynda aıtty.
«Jasandy ıntellekt quraldary kúndelikti ómirimizdiń ajyramas bóligine aınaldy. Ol adam ómirindegi ártúrli salaǵa tereńdep ene túsýde. JI júıelerin qoldaný 2030 jylǵa qaraı jahandyq jalpy ishki ónimdi 14%-ǵa arttyryp, 70%-ǵa deıin qosymsha ekonomıkalyq tıimdilik berýi múmkin. Sarapshylardyń baǵalaýynsha, bıyl kompanııalardyń jasandy ıntellekt salasyndaǵy ázirlemelerge jumsaıtyn shyǵyny ótken jylmen salystyrǵanda eki ese ulǵaıady», - dedi O.Bektenov búgingi Úkimet otyrysynda.
Onyń aıtýynsha, JI quraldaryn qoldaný kóptegen kúndelikti mindetterdi avtomattandyrýǵa múmkindik beredi. Mysaly, bıznes pen óndiriste úlken kólemdegi derekterdi óńdeýge jáne taldaýǵa nemese klıentterge qyzmet kórsetýge baılanysty mindetterdi oryndaýǵa bolady. Sondaı-aq JI densaýlyq saqtaý salasyndaǵy táýekelderdi jáne tótenshe jaǵdaı boljamdaryn eseptep, ártúrli qaýipter men kıbershabýyldardy anyqtaı alady.
«Sondyqtan Memleket basshysy jasandy ıntellekt salasyn damytý jáne ony qoldanatyn jobalardy keńinen taratý jónindegi strategııalyq qujat ázirleýdi tapsyrdy. Jasandy ıntellektini engizýge arnalǵan ekonomıkanyń basym sektorlary aıqyndaldy. Onda memlekettik basqarý, munaı-gaz, taý-ken óndirý, energetıka, kólik, logıstıka, sýmen jabdyqtaý jáne aýyl sharýashylyǵy salalaryndaǵy tabıǵı monopolııa sýbektileri bar. Tıisti ınfraqurylymdy qurý, derekterdi óńdeýdiń eń sońǵy úlgidegi ortalyqtaryn salý, sýperkompıýterdi iske qosý jáne Ulttyq jasandy ıntellekt platformasynyń jumys isteýi sharalaryn jandandyrý qajet», - dedi Premer-Mınıstr.
Búgin Tsıfrlyq damý, ınnovatsııalar jáne aeroǵarysh ónerkásibi mınıstri 2024-2029 jyldarǵa arnalǵan Jasandy ıntellektti damytý tujyrymdamasyn tanystyrǵan edi.
«Bizge osy saladaǵy bilikti mamandar qajet. Bul rette otandyq kompanııalardyń múmkindikteri men qajettilikterin barynsha eskerý mańyzdy, bul tutastaı ekonomıkaǵa mýltıplıkatıvtik áser beredi. Jalpy, tujyrymdama jobasyn qoldaımyz. Tıisti qaýlyǵa daýys berýdi usynamyn», - dedi Oljas Bektenov.
