Úkimet 2026 jyly shaǵyn bızneske salyqtyq jeńildikterdi jalǵastyrady
ASTANA. KAZINFORM – Qazaqstan Úkimeti mıkro jáne shaǵyn kásipkerlik sýbektilerine arnalǵan salyqtyq ákimshilendirýdi jeńildetý sharalaryn 2026 jyly da jalǵastyrady. Bul týraly Memlekettik kirister komıteti habarlady.
Vedomstvo málimetinshe, sheshim makroekonomıkalyq turaqtylyqty qamtamasyz etý, ekonomıkalyq reformalardyń kásipkerlik belsendilikke yqpalyn azaıtý jáne bızneske qolaıly jaǵdaı qalyptastyrý maqsatynda qabyldanǵan.
Eske salaıyq, 2026 jylǵy 1 qańtardan bastap mıkro jáne shaǵyn bıznes úshin shartty túrde «taza paraq» tetigi engizilgen bolatyn. Bul tetik salyqtyq ákimshilendirýde ıkemdi ári yntalandyrýshy tásilderdi qoldanýǵa múmkindik berdi.
Atalǵan júıe aıasynda 2026 jylǵy 1 qańtarǵa deıin qalyptasqan salyqtyq mindettemeler boıynsha mıkro jáne shaǵyn kásipkerlik sýbektilerine qatysty kameraldyq baqylaý, salyqtyq tekserý, ákimshilik is júrgizý jáne sot arqyly óndirip alý sharalary jekelegen jaǵdaılarda qoldanylmaǵan.
Komıtettiń málimetinshe, qabyldanǵan sharalar naqty nátıje bergen.
– Qazirgi ýaqytta mıkro jáne shaǵyn kásipkerliktiń 19 myń sýbektisi jalpy kólemi 13 mlrd teńge bolatyn negizgi salyq bereshegin ótedi. Nátıjesinde 4,4 mlrd teńge ósimpul jáne 4,9 mlrd teńge aıyppul esepten shyǵaryldy, – delingen habarlamada.
Úkimet 2026 jyly da bızneske túsetin ákimshilik júktemeni azaıtý jumystaryn jalǵastyrmaq.
Atap aıtqanda, mıkro jáne shaǵyn kásipkerlik sýbektileri qosylǵan qun salyǵyna qatysty birqatar quqyq buzýshylyq úshin ákimshilik jaýapkershilikke tartylmaıdy.
Bul jeńildik 2026 jylǵy 1 qańtar men 31 jeltoqsan aralyǵynda QQS tóleýshi retinde tirkelmeı júzege asyrylǵan aınalym kólemi belgilengen shekti mólsherden aspaǵan jaǵdaılarǵa qatysty bolady.
Sonymen qatar Ákimshilik quqyq buzýshylyq týraly kodekstiń 269-babynyń úshinshi bóligi men 275-babynyń besinshi bóliginde kózdelgen quqyq buzýshylyqtar boıynsha, eger kásipkerler memlekettik kirister organdarynyń QQS boıynsha tirkeý týraly habarlamasyndaǵy talaptardy tolyq oryndasa, ákimshilik jaýapkershilik qoldanylmaıdy.
Memlekettik kirister komıteti qabyldanyp jatqan sheshimder memleket pen bıznes arasyndaǵy senim men áriptestikti nyǵaıtýǵa baǵyttalǵanyn atap ótti.
Aıta keteıik, buǵan deıin qarjy sektorynda salyq erejeleri jańartylyp, birqatar jeńildik qarastyrylatyny habarlandy.
