Úkimet 2026 jyly ekonomıkany alǵa tartýǵa qaýqary bar salalardy atady
ASTANA. KAZINFORM - Aldaǵy jyly óńdeý ónerkásibi, qurylys, kólik jáne qoımalaý, saýda salalary, ónimder men sýsyndar óndirisi ekonomıkanyń ósimine negizgi úles qosýy tıis.
Bul týraly Úkimette vıtse-premer – ulttyq ekonomıka mınıstri Serik Jumanǵarınniń tóraǵalyǵymen 2026 jylǵa arnalǵan áleýmettik-ekonomıkalyq damý boljamy men JІÓ ósý parametrlerin talqylaýǵa arnalǵan májilis barysynda málim boldy.
Úkimet músheleriniń aıtýynsha, óńdeý ónerkásibinde 2025 jylǵy qorytyndy boıynsha naqty kólem ındeksi (NKI) 6% deńgeıinde ósýi múmkin. 2026 jyly Qazaqstan Respýblıkasynyń 2029 jylǵa deıingi ulttyq damý jospary sheńberinde nysanaly kórsetkish 6,2% deńgeıinde bolady dep belgilendi.
Óńdeý salasynyń negizgi draıveri sanalatyn metallýrgııada óndiristiń ósýi 2026 jyly 3% deńgeıinde josparlanyp otyr. Ónim kólemi, eń aldymen, bıyl jáne byltyrlary iske qosylǵan Kyzyl Aray Copper, EkibastuzFerroAlloyse, Kazferrolimited, Shagala Mining jáne taǵy da basqa zaýyttardyń jobalyq qýatynyń artýy esebinen ulǵaıady. Qara metallýrgııada ferroqorytpa, bolat, jalpaqtap jaımalanǵan temir men shoıyn óndirisin, tústi metallýrgııada altyn, mys, alıýmınıı, myrysh óndirisin ulǵaıtý josparlanyp otyr.
Mashına jasaýda 2026 jylǵy josparly ósý kórsetkishi 13,4% deńgeıinde belgilendi. Bul kórsetkishke bıyl iske qosylǵan «Astana Motors Manufacturing Kazakhstan» JShS jáne «KIA Qazaqstan» JShS arqyly jeńil avtomobıl óndirý kólemin 17%-ǵa ulǵaıtý esebinen qol jetkizilmek. Budan basqa, aýyl sharýashylyǵy tehnıkasyn shyǵarý 5%-ǵa ósedi dep josparlanǵan.
Bir aıta ketetini, 2025 jyldyń qorytyndysynda 436,5 myń birlik turmystyq tehnıka shyǵarylmaq. Bul 2024 jylmen salystyrǵanda 1,5 ese artyq. Teledıdar, kir jýǵysh mashına, plıta pesh jáne taǵyda basqa turmystyq tehnıkany Qazaqstanda «SILK ROAD ELECTRONICS» JShS, «ALMATY TURMYSTYQ TEHNIKA ZAÝYTY» JShS jáne «DS Multimedia CA» JShS shyǵarady. 2026 jyly turmystyq tehnıkany 2025 jylmen salystyrǵanda 1,5 ese kóp óndirý josparlanyp otyr.
2026 jyly hımııa ónerkásibi óndirisiniń ósýi 7% deńgeıinde bolady dep kútilip otyr. Ol kúkirt qyshqyly, natrıı tsıanıdi, sýtegi asqyn totyǵy jáne suıyq shyny sekildi jańa qýattardy engizý arqyly júzege asyrylady.
Qurylys materıalyn óndirýde bıyl otandyq taýar óndirýshilerdiń ishki naryqtaǵy úlesi 70%-ǵa jetti. 2026 jyly bul sektorda NKI 6%-ǵa ósýi yqtımal. Portlandtsement, keramıkalyq taqtaısha, temirbeton men taýarlyq beton óndirisi draıverge aınalady. Rezervter arasynda Shymkenttegi keramıkalyq taqtaısha shyǵaratyn jańa zaýyt pen tsement zaýyty bar. 2025 jyly tsement óndirisi rekordtyq kólemde ósedi. 2026 jyly kásiporyndar jobalyq qýatyna shyqqan saıyn ósý de jalǵasady.
Saýda salasynda 2025 jyldyń qorytyndysy boıynsha taýar aınalymy nomınaldyq mánde 108,9%-ǵa deıin óspek. Bul shamamen 80,3 trln teńge (+14,6%). 2026 jylǵy nysanaly kórsetkish 106,5% ósimmen 92,4 trln teńgeni quraıdy.
Ósim munaı men munaı ónimderin óndirý kólemin saqtaý, azyq-túlik jáne azyq-túlik emes taýarlardy qaıta óńdeýdiń aýqymdy baǵdarlamasyn iske qosý, sondaı-aq Qytaı baǵytyn qosa alǵanda, kóterme eksporttyq saýdaǵa baǵdarlanǵan tórt iri B2B alańynyń jumysyn tolyqtaı bastaý arqyly júzege asyrylady.
Aýyl sharýashylyǵynda 2026 jyly azyq-túlik jáne sýsyn óndirisinde joǵary ósim bolýy múmkin. Ol tıisinshe 109% jáne 109,3%-dy quramaq.
- Keńes sońynda vıtse-premer ortalyq memlekettik organdarǵa ónerkásiptik ósýdiń josparly kórsetkishine qol jetkizip, negizgi ınvestıtsııalyq jáne ınfraqurylymdyq jobalardy júzege asyrý úshin, qosymsha rezervterdi pysyqtap, aýyl sharýashylyǵynda, saýda men kólikte turaqty ósý serpinin qamtamasyz etýge basa nazar aýdara otyryp, salalardy damytýdyń jol kartasyn ázirlep, usynýdy tapsyrdy, - delingen habarlamada.
Osyǵan deıin Oljas Bektenov óńdeý ónerkásibinde iri ınvestıtsııalyq jobalardy júzege asyrý máseleleri boıynsha birqatar kezdesý ótkizgeni týraly habarladyq.