Úkimet 2026-2030 jyldarǵa arnalǵan boksty damytý tujyrymdamasyn bekitti
ASTANA. KAZINFORM – Qazaqstan Úkimeti Memleket basshysy Qasym-Jomart Toqaevtyń tapsyrmalaryn iske asyrý aıasynda 2026-2030 jyldarǵa arnalǵan boksty damytý tujyrymdamasyn bekitti. Tıisti qaýlyǵa Premer-mınıstr Oljas Bektenov qol qoıdy.
Qujatqa sáıkes, elimizde boksty damytý sapaly jańa deńgeıge kóteriledi. Tujyrymdamanyń basty maqsaty – bokspen aınalysatyn azamattar sanyn arttyrý, sportshylardy daıarlaý júıesiniń tıimdiligin kúsheıtý jáne qazaqstandyq boksshylardyń halyqaralyq arenadaǵy básekege qabilettiligin nyǵaıtý.
Tujyrymdama 6 bólimnen turady jáne salany damytýdyń negizgi baǵyttaryn tolyq qamtıdy. Negizgi basymdyqtar qatarynda boks ınfraqurylymyn damytý, buqaralyq sportty keńeıtý jáne sport rezervin qalyptastyrý, ǵylymı-ádistemelik jáne medıtsınalyq súıemeldeýdi jetildirý, jattyqtyrýshylar men tóreshilerdiń biliktiligin arttyrý, sondaı-aq halyqaralyq yntymaqtastyq pen kásibı boksty damytý kózdelgen.
Qoıylǵan mindetterdi júzege asyrý úshin 31 is-sharadan turatyn keshendi jospar bekitilgen. Bul jospar saladaǵy ózekti máselelerdi júıeli túrde sheshýge jáne naqty nátıjelerge qol jetkizýge baǵyttalǵan.
Qazirgi tańda Qazaqstanda bokspen 153 myńnan astam adam aınalysady. Olarmen elimizdiń barlyq 20 óńirinde 2 myńnan astam jattyqtyrýshy jumys isteıdi. Ulttyq qurama quramynda 595 sportshy bar – olardyń qatarynda negizgi, jastar, jasóspirimder jáne balalar komandalary qamtylǵan.
Sonymen qatar, ótken jyldyń qorytyndysy boıynsha 39 myńnan astam bala balalar-jasóspirimder sport mektepterinde bokspen shuǵyldanady. Olardy 1 385 bapker daıarlap keledi.
2026-2030 jyldarǵa arnalǵan tujyrymdama aıasynda bokspen aınalysýshylar sanyn ulǵaıtý, daıyndyq júıesiniń sapasyn arttyrý jáne qazaqstandyq sportshylardyń álemdik deńgeıdegi pozıtsııasyn kúsheıtý josparlanyp otyr.
Qujatty iske asyrý otandyq bokstyń júıeli damýyna jańa serpin berip, jastar arasynda salaýatty ómir saltyn nasıhattaýǵa jáne halyqaralyq arenada Qazaqstannyń ımıdjin nyǵaıtýǵa yqpal etpek.
Aıta keteıik, Úkimette tsıfrlandyrý, básekelestik jáne EAEO naryǵyna qol jetkizý máselesi talqylandy.
