Úkimet 2026-2028 jyldar jáne 2035 jylǵa deıingi uzaq merzimdi damý boljamyn maquldady
ASTANA. KAZINFORM — Úkimet basshysy Oljas Bektenov 2026-2028 jyldarǵa arnalǵan áleýmettik-ekonomıkalyq damý boljamyn jáne 2035 jylǵa deıingi uzaq merzimdi damý boljamyn maquldaýdy usyndy.
— Jaqynda Memleket basshysyna áleýmettik-ekonomıkalyq damý boljamdary men aldaǵy úsh jyldyq kezeńge arnalǵan bıýdjet jobasy usynyldy. Prezıdent bıýdjettiń teńgerimdiligin, qarajatty respýblıkalyq jáne jergilikti deńgeıde sapaly josparlaý men bólýdi qamtamasyz etýdi tapsyrdy. Osyǵan baılanysty búgin jalpy sıpattaǵy transfertter kólemi jáne 2026-2028 jyldarǵa arnalǵan respýblıkalyq bıýdjet týraly zań jobalary qaraldy. Zań jobalary bıýdjettik parametrlerge sáıkes ázirlendi sondaı-aq memlekettik qarjynyń turaqtylyǵyn qamtamasyz etý úshin barynsha ońtaıly, — dedi Oljas Bektenov Úkimet otyrysynda.
Premer-mınıstrdiń málimdeýinshe, bıýdjet teńdestirilgen jáne Memleket basshysy kótergen barlyq strategııalyq bastama eskerilgen.
— Talqylaýlardy eskerip, 2026-2028 jyldarǵa arnalǵan áleýmettik-ekonomıkalyq damý boljamyn jáne 2035 jylǵa deıingi uzaq merzimdi boljamdy maquldaýdy usynamyn. 2026-2028 jyldarǵa arnalǵan respýblıkalyq bıýdjet týraly jáne aldaǵy úsh jyldyq kezeńge arnalǵan jalpy sıpattaǵy transferttiń kólemi týraly zań jobalaryna daýys bereıik. Daýys berińizder, — dedi Úkimet basshysy.
Osylaısha Úkimet músheleri uzaq merzimdi boljamdy bir aýyzdan maquldady.
Aıta keteıik, 2035 jyly bıýdjet kirisi 66,8 trln teńgege deıin ulǵaıady degen boljam jasaldy.