Úkimet 2024-2029 jyldarǵa arnalǵan ekomádenıetti damytý tujyrymdamasyn bekitti

ASTANA. KAZINFORM — Memleket basshysy Qasym-Jomart Toqaevtyń tapsyrmasymen Úkimet 2024-2029 jyldarǵa arnalǵan «Taza Qazaqstan» ekologııalyq mádenıetti damytý tujyrymdamasyn bekitti, dep habarlaıdy Úkimettiń baspasóz qyzmeti.

Premer-mınıstr Oljas Bektenov tıisti qaýlyǵa qol qoıdy.

«Taza Qazaqstan» tujyrymdamasy ekologııalyq mádenıetti damytýdyń ártúrli ádis-tásilin qamtıtyn keshendi ádisti qarastyrady. Negizgi baǵyttar ekologııalyq oılaýdy qalyptastyrýdy, jaýapty minez-qulyqty damytý jáne ony yntalandyrý sharalaryn, ekologııalyq bilim berý men aqparattandyrýdy qamtıdy.

Tujyrymdamany iske asyrý ekologııa týraly azamattardyń habardarlyǵyn arttyrýǵa, ekologııalyq ádetterdi qalyptastyrýǵa jáne halyqtyń ekologııalyq bastamalarǵa qatysýyn jandandyrýǵa múmkindik beredi.

Nysanaly kórsetkishterge sáıkes, 2029 jylǵa qaraı kommýnaldyq qaldyqtardy qaıta óńdeý deńgeıin 25%-dan 38%-ǵa deıin arttyrý, sondaı-aq ekologııalyq tárbıeni nyǵaıtý is-sharalaryna tartylǵan oqýshylar úlesin 15%-dan 40%-ǵa deıin ulǵaıtý josparlanýda. Sonymen qatar azamattardyń ekologııalyq ómir sapasyna qanaǵattaný deńgeıin 55,8%-dan 64,7%-ǵa deıin arttyrý kútilýde.

Tujyrymdamany iske asyrý qoǵamdyq oryndarda kommýnaldyq qaldyqtardy bólek jınaý ınfraqurylymyn damytýdy, ekologııalyq qaýipsiz tájirıbelerdi engizýdi jáne qorshaǵan ortany lastaýǵa «nóldik tózimdilik» mádenıetin qalyptastyrýdy kózdeıdi.

Sondaı-aq Qujatta Tujyrymdamany iske asyrý jónindegi is-qımyl jospary bekitildi.

Eske salsaq, buǵan deıin Oljas Bektenov Ortalyq Azııa elderi men halyqaralyq qarjy uıymdaryn kúsh biriktirýge shaqyrdy.