Úkimet 1,3 trln teńgeden astam somaǵa 110 salyqtyq jeńildikti alyp tastamaq

ASTANA. KAZINFORM – Úkimet 1,3 trln teńgeden astam somaǵa 110 salyqtyq jeńildikti alyp tastamaq. Bul týraly búgin Májiliste jańa Salyq kodeksiniń jobasyn tanystyrǵan Ulttyq ekonomıka vıtse-mınıstri Azamat Ámrın aıtty.

«Kelesi mindet – salyq jeńildikterin retke keltirý jáne olardyń kólemin kem degende 20 paıyzǵa qysqartý. 2022 jylǵy salyq deklaratsııalarynyń derekteri boıynsha olardyń somasy 744 norma boıynsha 9,5 trln teńge boldy. Biz saraptama júrgizdik. Onyń ishinde 459 norma 3,3 trln teńge somaǵa jeńildikter retinde anyqtaldy. Osy 459 normadan 1 300 mlrd teńgeden astam somaǵa 110 salyq jeńildikterin alyp tastaý usynylady. Budan basqa, 400 mlrd teńgeden astam somaǵa 29 salyq jeńildikteri boıynsha qoldanylý merzimi shekteletin bolady», - dedi vıtse-mınıstr.

Onyń dereginshe, ótken jyldary salyq eseptiliginiń nysandary barynsha jeńildetildi. Bul esep júrgizýge qıyndyq týdyrdy. Endi jeńildik mindetti túrde salyq eseptiligi nysandarynda kórsetiledi. Budan basqa, tıisti salalyq memlekettik organdarǵa tıimdilik kórsetkishteriniń monıtorıngi boıynsha mindettemelerdi bekitý usynylady.

«Sondaı-aq, júıeli sharalar retinde salyqtyq jeńildikter uǵymyn naqty reglamentteý, olardy berý tártibi, monıtorıng, taldaý, olardy alyp tastaý tártibi usynylady. Munyń bári zańǵa táýeldi aktilermen retteletin bolady», - dedi Azamat Ámrın.