Úkimet: 1,1 trln teńgeden asatyn 968 uzaqmerzimdi kelisimshart jasaldy
ASTANA. KAZINFORM — 2025 jyldyń І jartyjyldyǵynda quny 1,1 trln teńgeden asatyn 968 uzaqmerzimdi kelisimshart jasaldy. Bul týraly Úkimet málim etti.
— 2024 jyly elimizde quny $2 mlrd-tan asatyn 898 uzaqmerzimdi sharttar men ofteık-kelisimsharttar jasaldy, 2025 jylǵy qańtar-maýsym aılarynda quny 1,132 trln teńgege bolatyn 968 shart resimdeldi, bul ótken jyldyń sáıkes kezeńiniń kórsetkishinen 1,9 esege joǵary, — delingen habarlamada.
Jaqsy mysal retinde Taldyqorǵanda usaqtaý sharlaryn óndiretin zaýyt salýǵa KAZMinerals jáne chılılik ME Elecmetal kompanııalary arasyndaǵy ınvestıtsııa kólemi $85 mln bolatyn ofteık-kelisimshartyn keltirýge bolady. Joba halyqaralyq ınvestorlarmen áriptestikti keńeıtý jónindegi Prezıdent tapsyrmasyna sáıkes júzege asyrylýda. Bıyl iri tapsyrys berýshilerdi, sonyń ishinde jer qoınaýyn paıdalanýshylardy taýarlar, jumystar men qyzmetterdi satyp alýdaǵy qazaqstandyq qamtý úlesin ulǵaıtý jónindegi baǵdarlamalardy ázirleýge jáne oryndaýǵa mindetteıtin túzetýler qabyldandy.
Ónerkásip salasyn qoldaý úshin jańa qural — kepildendirilgen satyp alý sharty engizildi. Osyndaı sharttyń talaptaryna sáıkes, óndiris kásiporny ónimdi belgili bir kólemde turaqty túrde jetkizýge mindettenedi, al tapsyrys berýshi salanyń boljamdylyǵyn jáne ornyqty damýyn qamtamasyz etetin uzaqmerzimdi satyp alýǵa kepildik beredi.
Úkimet otandyq taýar óndirýshiler men shaǵyn bıznesti qoldaýdy keńeıte túspek.