Úkimet 10 ulttyq joba men eki membaǵdarlamanyń kúshin joıdy
ASTANA. KAZINFORM — Qarjy mınıstri Mádı Tákıev Parlament palatalarynyń birlesken otyrysynda memlekettik baǵdarlamalar men ulttyq jobalardyń iske asyrylý deńgeıine toqtaldy.
«2022 jyldan bastap Úkimet jobalyq basqarýdyń belgilengen ólshemsharttaryna sáıkes keletin ulttyq jobalardyń jańartylǵan tizbesin aıqyndaý jumystaryn júrgizdi. Bıýdjettiń múmkindikteri men basymdyqtaryn eskere otyryp, 3 ulttyq joba qabyldandy. Olar: „Jaıly mektep“, „Aýylda densaýlyq saqtaýdy jańǵyrtý“, „Qoljetimdi ınternet“. Atalǵan jobalardy iske asyrýǵa túrli kózderden 625,2 mlrd teńge, onyń ishinde respýblıkalyq bıýdjetten 536,4 mlrd teńge bólindi», — dedi ol.
Mınıstr qalǵan 10 ulttyq joba men 2 memlekettik baǵdarlamanyń kúshi joıylǵanyn eske saldy.
«Búgingi kúnniń ózekti taqyryby — memlekettik borysh máselesi. Halyqtyń erekshe nazaryndaǵy bul suraq, depýtattyq korpýs tarapynan jıi kóteriledi. Atap ótkenimdeı, búgingi tańda barlyq belgilengen boryshtyq kovenanttar saqtalýda. Júrgizilip otyrǵan memlekettik boryshty basqarý saıasaty belgilengen qarjylyq shekteýler qatań saqtalyp júzege asyp jatyr. Sonymen qatar, biz qabyldanǵan mindettemelerdiń ashyqtyǵy men aıqyndyǵyn arttyrý boıynsha Joǵary aýdıtorlyq palata bastamalaryn nazarǵa alamyz», — dedi Mádı Tákıev.
