Úkim kúshine endi: Sultan Sarsemalıev apellıatsııalyq shaǵym jazǵan joq
ATYRAÝ. KAZINFORM — Sultan Sarsemalıevti ómir boıyna bas bostandyǵynan aıyrý týraly úkim kúshine endi. Ata-enesi men áıeliniń baýyrlaryn óltirgen sottalýshy apellıatsııalyq shaǵym jazǵan joq. Bul aqparatty oblystyq sottyń baspasóz qyzmeti rastady.
Atyraý oblysyndaǵy Jangeldın aýylynda bir otbasynyń tórt múshesin óltirgen Sultan Sarsemalıev sot úkimine apellıatsııalyq shaǵym túsirmegen. Osylaısha Sarsemalıevke taǵaıyndalǵan jaza ózgerissiz qaldy. Aldaǵy ýaqytta ol ony óteý úshin elimizdegi ómir boıyna bas bostandyǵynan aıyrylǵandar otyratyn túrmege jiberiledi.
Sultan Sarsemalıev qaıynaǵasyn pyshaqtap óltirgennen keıin bank qosymshasy arqyly onyń atynan 4 mln teńge kóleminde taýarly nesıe rásimdegen. Іske núkte qoıylǵan kúni qylmystyq quqyqbuzýshylyqty jasaýǵa yqpal etken sebepter men jaǵdaılar bank tóraǵasy men oblys prokýrorynyń nazaryna tıisti sharalar qabyldaý týraly jekeshe qaýly shyǵaryldy.
Sottyń osy iske qatysty shyǵarǵan jeke qaýlysyna qatysty bir ǵana shaǵym túsken edi. Ony elimizdegi ekinshi deńgeıli bankterdiń biri bergen. Ázirge bul shaǵym oblystyq sotqa túspegen. Sondyqtan qashan qaralatyny belgisiz.
Sýdıa úkimdi túsindirý kezinde banktiń tarapynan jeke tulǵanyń qatysýy nemese beınerastaý talap etilmegenin aıtqan edi. Sot mundaı qylmysqa jol bermeý úshin bankke jáne prokýrorǵa taýarlyq nesıeni berý talabyn qaıta qaraý kerektigi týraly sheshim qabyldady.
Alaıaqtyq deregi belgili bolǵannan keıin bank qaryzdy esepten shyǵarǵan.
Buǵan deıin Sultan Sarsemalıevtiń áıeli Aqbaıan Muqanǵalıeva psıhıkalyq densaýlyq ortalyǵynan shyǵaryldy. Keıin ol kámeletke tolmaǵandardy beıimdeý ortalyǵyna, sábıler úıine baryp, balalarymen kezdeskenin jazǵan edik.
