UQK joǵary oqý oryndaryna qabyldaý erejeleri ózgerdi
ASTANA. KAZINFORM – Ulttyq qaýipsizdik komıteti tóraǵasynyń buıryǵymen joǵary bilim berýdiń bilim berý baǵdarlamasyn iske asyratyn ulttyq qaýipsizdik organdarynyń áskerı jáne arnaýly oqý oryndaryna oqýǵa qabyldaý qaǵıdalaryna ózgerister engizildi.
Ózgeristerge sáıkes, ulttyq qaýipsizdik organdarynyń kadr bólimshesi joldamany bekitkennen keıin:
- 10 jumys kúni ishinde BAQ-ta, aqparattyq taqtalarda jáne Ulttyq qaýipsizdik komıtetiniń resmı ınternet-resýrsynda ótinish berý merzimi men qajetti qujattar tizimi týraly habarlandyrýlar ornalastyrylady;
- turǵylyqty jeri, oqýy nemese qyzmet orny boıynsha kandıdattardyń kásibı jaramdylyǵy tekseriledi, irikteý jáne arnaıy tekserý júrgiziledi.
Kandıdattar oqý tili kórsetilgen ótinish nemese raportty UQK organdaryna turǵylyqty jeri, oqýy nemese qyzmet orny boıynsha oqý jylynyń 10 qańtaryna deıin tapsyrady.
Merzimdi áskerı qyzmetin ótegen jáne arnaıy memlekettik organdardyń áskerı bólimderinde konkýrstyq irikteýden ótken azamattar demobılızatsııadan keıin bir jyl ishinde UQK Shekara qyzmetiniń kadr bólimshelerine Ulttyq qaýipsizdik organdarynyń JOO-ǵa túsý úshin ótinish beredi.
Oqý jylynyń 20 mamyryna deıin UQK organdarynyń kadr bólimsheleri qalyptastyrylǵan jeke isti oqý oryndaryna joldaıdy. JOO jeke istiń talapqa sáıkestigine tekseredi (Shekara akademııasyna túsetinderge arnalǵan arnaıy tekserý materıaldarynan jáne UQK akademııasy qalyptastyrǵan isterden basqa, isti UQK kadr departamenti tekseredi).
Emtıhanǵa kez kelgen qaǵaz nemese derekterdi saqtaý nemese jetkizýge arnalǵan elektrondyq qural alyp kirýge tyıym salynady. Burmalaý faktisi anyqtalǵan jaǵdaıda akt jasalyp, emtıhan nátıjesi joıylady.
Qabyldaý týraly sheshim Ulttyq qaýipsizdik organdarynyń JOO-nyń aqparattyq taqtalaryna ornalastyrylady, sondaı-aq aýyzsha qabyldaý komıssııasy músheleri nemese kadr bólimsheleri arqyly habarlanady.
Qabyldaý kandıdattardyń reıtıngi negizinde júzege asyrylady:
- joǵary bilim berý baǵdarlamalary boıynsha UBT balynyń jáne kásibı irikteý kórsetkishiniń jıyntyǵy negizinde (merzimdi áskerı qyzmet ótegen jáne arnaıy organdarda konkýrstyq irikteýden ótken azamattardan basqa);
- qysqartylǵan oqý merzimi bar baǵdarlamalar boıynsha qorytyndy kásibı irikteý kórsetkishi negizinde.
Merzimdi áskerı qyzmet ótegen jáne arnaıy organdarda konkýrstyq irikteýden ótken azamattar úshin kvota belgilenedi. Atap aıtqanda, shekara akademııasyna josparlanǵan qabyldaý kóleminiń 10%-nan aspaıdy, al Ulttyq qaýipsizdik komıteti akademııasyna - 5%.
UQK akademııasyna túsýden úmitkerler qosymsha kásibı jaramdylyq tekserisinen ótedi jáne esse jazady.
2025 jylǵy 19 qyrkúıekten bastap UQK akademııasyna túsý kezinde ball teń bolǵan jaǵdaıda basymdyqqa ıe bolady:
- «Altyn belgi» ıegerleri;
- patrıotızm men azamattyq belsendiligi úshin belgimen marapattalǵandar;
- keminde bir jyldyq eńbek ótili bar kolledj túlekteri;
- halyqaralyq olımpıadalar men konkýrstardyń (I–III dárejeli dıplomy bar), sondaı-aq prezıdenttik jáne respýblıkalyq olımpıadalardyń bıylǵy jeńimpazdary;
- jetim balalar men ata-anasynyń qamqorlyǵynsyz qalǵandar, sondaı-aq kámeletke tolǵanǵa deıin ata-anasynan aıyrylǵan jastar;
- úzdik dıplom ıeleri.
UQK Shekara akademııasyna túsý kezinde basymdyq beriledi:
- jetim balalar men ata-anasynyń qamqorlyǵynsyz qalǵandar;
- eki jyldyq áskerge deıingi daıyndyqtan «jas sarbaz» nemese «jas aıbyn» retinde ótkender (2026 jylǵy 1 qańtardan bastap);
- qyzmettik mindetin atqarý kezinde qaza tapqan nemese múgedek bolǵan áskerı qyzmetshilerdiń balalary;
- keminde 15 jyl qyzmet atqarǵan áskerı qyzmetshilerdiń, sondaı-aq 20 jyldan keıin (teris sebepter boıynsha bosatylǵandardan basqa) qyzmetten bosatylǵandardyń balalary;
- «Altyn belgi» ıegerleri;
- sońǵy 3 jylda halyqaralyq jáne respýblıkalyq olımpıadalardyń, konkýrstardyń jáne sporttyq jarys jeńimpazdary (I–III dárejeli dıplom).
Buıryq 2025 jylǵy 26 tamyzdan bastap, jekelegen normalary 2025 jylǵy 1 shildeden, 2025 jylǵy 19 qyrkúıekten jáne 2026 jylǵy 1 qańtardan bastap kúshine enedi.
Taıaýda ǵana Ulttyq qaýipsizdik komıtetinde kadrdy irikteý qalaı júrgiziledi, qandaı mamandyqtar suranysqa ıe degen taqyrypty qozǵaǵan edik.