UQK úsh óńirde júrgizýshi kýáligin rásimdeýdegi jemqorlyq shemasyn áshkereledi
ASTANA. KAZINFORM – Jyldyń basynan beri Astana qalasynda, Aqmola jáne Pavlodar oblystarynda avtomektepterdiń qyzmetin uıymdastyrý jáne júrgizýshi kýálikterin resimdeý kezinde zańsyz syıaqy alý jáne ókilettikterdi teris paıdalaný faktileri anyqtalǵan. Bul týraly UQK baspasóz qyzmeti málim etti.
— Astana qalasynda Mamandandyrylǵan Halyqqa qyzmet kórsetý ortalyǵy (HQKO) basshysynyń burynǵy orynbasary júıeli túrde para alý arqyly azamattarǵa emtıhan tapsyrýǵa jáne júrgizýshi kýáligin alýǵa járdemdeskeni úshin áshkerelendi, — delingen habarlamada.
Jalpy somasy 100 mln teńgeden asatyn 60-tan astam fakti tirkeldi.
— Kókshetaý qalasyndaǵy Mamandandyrylǵan HQKO jáne Ekibastuz qalasyndaǵy «Azamattarǵa arnalǵan úkimet» memlekettik korporatsııasy» KEAQ fılıaldary basshylarynyń zańsyz áreketteriniń joly kesildi. Olardyń jalǵan tulǵalar arqyly emtıhan tapsyrýdy uıymdastyrǵany úshin aqshalaı qarajat alǵany anyqtaldy, — dep habarlady UQK-nen.
Budan bólek, Astana, Shymkent jáne Taraz qalalaryndaǵy «Azamattarǵa arnalǵan úkimet» Memlekettik korporatsııasy» KEAQ fılıaldarynda jyljymaıtyn múlikti qaıta tirkeý jáne aýyrtpalyqtardy alyp tastaý kezinde óz ókilettikterin teris paıdalanǵan laýazymdy tulǵalardyń zańsyz baıý faktileri anyqtaldy.
Atalǵan faktiler boıynsha sotqa deıingi tergep-tekserý júrgizilip jatyr. Qylmystyq-protsestik kodekstiń 201-babyna sáıkes ózge aqparat jarııa etýge jatpaıdy.
Eske sala keteıik, buǵan deıin UQK Shymkentte Ekonomıkalyq tergep-tekserý departamenti qyzmetkerine qatysty tergeýdi bastaǵanyn jazǵan edik.
