UQK Taldyqorǵanda sot-medıtsınalyq saraptama basshysynyń ustalǵanyn rastady
ASTANA. KAZINFORM — Taldyqorǵanda sot-medıtsınalyq saraptama qyzmetiniń jetekshisi qolǵa tústi. Ol qaıtys bolǵan adamnyń týystarynan para aldy degen kúdikke ilindi.
Aldyn ala málimet boıynsha, zańsyz syıaqy kólemi 200 myń teńge bolǵan. Kúdikti bul aqshany marqumnyń denesin tilmeı, máıitti jerleý úshin týystaryna tezirek qaıtaryp berý maqsatynda alǵan degen boljam bar.
Derekterge súıensek, para berý sáti quqyq qorǵaý organdarynyń baqylaýymen ótken.
Syıaqyny alǵan boıda kúdiktini Ulttyq qaýipsizdik komıteti ókilderi tutqyndady.
Qazaqstan Respýblıkasy Ulttyq qaýipsizdik komıteti tergeý amaldary júrip jatqanyn rastady.
— Qazirgi ýaqytta sotqa deıingi tergep-tekserý amaldary júrgizilip jatqanyn habarlaımyz. Qylmystyq-protsestik kodekstiń 201-baby 1-bóligine sáıkes, ózge málimetterdi jarııa etýge ruqsat joq, — dep málimdedi vedomstvo.
Tergeý múddesine baılanysty istiń basqa da mán-jaılary ashyp aıtylmaıdy.
Eske sala keteıik, buǵan deıin, UQK Aqtaý qalalyq tergeý sotynyń tóraǵasy Berik Óteevke qatysty qozǵalǵan is boıynsha resmı túsinikteme bergen.
