UQK Sırııadaǵy azamattar ne sebepti qaıtarylǵanyn túsindirdi

NUR-SULTAN. QazAqparat - QR Ulttyq qaýipsizdik komıtetiniń departament basshysy Baqytbek Rahymberdıev Qazaqstan Sırııadan azamattardy qandaı sebeptermen qaıtarǵanyn túsindirdi, dep habarlaıdy QazAqparat tilshisi.

«Qazaqstan azamattaryn elge qaıtarý jumysyna bizdiń qyzmetkerler basynan aıaǵyna deıin qatysty. Biraq osy jumystar aıaqtalǵan joq. Osy operatsııa boıynsha bizdiń qoǵamymyzda kóptegen saýaldar qoıylýda. Bul turǵyda «azamattardy Sırııadan qaıtarýdyń qajettigi qansha?», «nelikten olarǵa elge kirýge tyıym salýǵa bolmaıdy?» degen pikirler estilýde. Birinshiden, biz memleket retinde midetterimizdi oryndaı otyryp, óz azamattarymyzdy elge qaıtarýǵa tıistimiz. Kináliler boıynsha jazanyń oryndalýyn qamtamasyz etip, kinásizderdi ońaltýdan ótkizýimiz qajet. Bul jalpy álem boıynsha qabyldanǵan tájirıbe. Mysaly, 2018 jyly biz elimiz aýmaǵynda 50-den astam terrorızm men ekstremızmge qatysty shetel azamattaryn anyqtadyq. Barlyǵyn óz elderine deportatsııaladyq», - dedi B. Rahymberdıev.

Osy oraıda ol atalǵan operatsııa barysynda eń mańyzdy qadam balalardy qutqarýǵa qatysty ekenin atap ótti.

«Ekinshiden, osy azamattar shetelde qalyp qoısa qalaı bolady? Sodyrlar Qazaqstanǵa qarsy lańkestik is-áreketterin jalǵastyratyny anyq. Jyl saıyn biz shetel lańkesteri tarapynan birneshe teraktilerdiń jolyn kesemiz. Al Qazaqstanda olar eń az degende jaýapkershilikke tartylyp, ońaltýdan ótedi. Úshinshiden, eń bastysy biz balalardy qutqardyq. Odan bólek, shetelde qalyp qoıǵan balalar kim bolyp ósetini jaıly oılaný qajet. Olar terrorıster qataryn tolyqtyratyndyǵy anyq. Sondyqtan balalardy elge qaıtara otyryp, biz bolashaqtaǵy aýqymdy máseleni sheship otyrmyz. Osy qaıtyp kelgen adamdarǵa taǵy bir múmkindik berýimiz kerek», - dedi UQK ókili.

Aıta keteıik, Syrtqy ister mınıstriniń orynbasary Erjan Ashyqbaev Sırııadan qaıtarylǵan adamdardyń lańkestik qylmystarǵa qatysy barlary jazaǵa tartylatynyn málim etti.

Sırııadan qaıtarylǵan 16 er adam lańkestik kúdigi boıynsha tutqyndaldy.

Budan buryn habarlanǵandaı, jaqynda Sırııadan 231 Qazaqstan azamatynyń elge jetkizilýine baılanysty QR Prezıdenti Qasym-Jomart Toqaev málimdeme jasady.

«Meniń tapsyrmam boıynsha 7 jáne 9 mamyr kúnderi Sırııadan 231 Qazaqstan azamaty elge jetkizildi, onyń 156-sy - balalar, deni mektep jasyna deıingiler, sonyń ishinde 18-i - jetim balalar. Bul aýqymdy gýmanıtarlyq aktsııa - Tuńǵysh Prezıdent - Elbasy Nursultan Nazarbaevtyń tapsyrmasymen bıyl qańtar aıynda júrgizilgen «Jýsan» operatsııasynyń jalǵasy», - delingen Memleket basshysynyń málimdemesinde.

Eske salsaq, bıyl qańtarda Elbasy Sırııadan Qazaqstan azamattaryn evakýatsııalaý boıynsha gýmanıtarlyq operatsııaǵa baılanysty málimdeme jasady.