UQK Shymkenttegi Turan aýdanynyń bas sanıtar dárigeriniń ustalǵany týraly aqparatqa túsinik berdi
ShYMKENT. KAZINFORM – Áleýmettik jelilerde Shymkent qalasy Turan aýdany sanıtarııalyq-epıdemıologııalyq baqylaý basqarmasynyń basshysy Murat Beısenbaevtyń ustalǵany týraly aqparat tarady. Ulttyq qaýipsizdik komıteti sotqa deıingi tergeý júrgizilip jatqanyn rastady.
Jelide taraǵan málimetterge qaraǵanda, sheneýnik qaramaǵyndaǵy qyzmetkerler arqyly oń sanıtarııalyq qorytyndy berý úshin para alyp kelgen degen kúdikke ilingen.
Kazinform redaktsııasy UQK-ge Murat Beısenbaevtyń ustalǵany týraly aqparatty, qylmystyq is Qylmystyq kodekstiń qaı baby boıynsha tergelip jatqanyn, onyń protsestik mártebesin jáne oǵan qatysty bultartpaý sharasy tańdalǵanyn naqtylaý týraly saýal joldady. Sondaı-aq is boıynsha basqa da tulǵalardyń bar-joǵyn jáne materıaldarda zańsyz syıaqynyń qandaı somasy kórsetilýi múmkin ekenin surady.
UQK tek sotqa deıingi tergeý júrgizilip jatqanyn rastady.
– Qazaqstan Respýblıkasy Ulttyq qaýipsizdik komıteti sizderdiń saýaldaryńyzdy qarady. Sotqa deıingi tergeý júrgizilip jatqanyn habarlaımyz. Ózge aqparat Qylmystyq-protsestik kodekstiń 201-babynyń 1-bóligine sáıkes jarııa etýge jatpaıdy, – dep habarlady bólimshe bastyǵy O. Bektenov.
Vedomstvonyń resmı saıtyndaǵy málimetke sáıkes, 56 jastaǵy Murat Beısenbaev 2023 jylǵy mamyrdan Turan aýdanynyń sanıtarııalyq-epıdemıologııalyq baqylaý basqarmasyn basqaryp keledi.
Onyń medıtsınalyq-profılaktıkalyq jáne zańgerlik baǵyt boıynsha eki joǵary bilimi bar. Sanıtarııalyq-epıdemıologııalyq qyzmet salasynda 20 jyldan astam ýaqyt jumys istegen. Ár jyldary Túrkistan oblysynyń Túlkibas jáne Maqtaaral aýdandaryndaǵy sanıtarııalyq-epıdemıologııalyq baqylaý basqarmalaryn basqarǵan. Sondaı-aq Túrkistan qalasy men Shymkenttiń Eńbekshi aýdanyndaǵy beıindi vedomstvolarǵa jetekshilik etken.
Buǵan deıin UQK Astana qalasy Polıtsııa departamenti kóshi-qon qyzmeti basqarmasynyń burynǵy bastyǵy Erbol Mahmetovtyń ustalǵanyn habarlaǵan bolatyn.
