UQK Shymkenttegi aýdandyq polıtsııa basqarmasy basshysynyń ustalǵanyn rastady
ShYMKENT. KAZINFORM — Ulttyq qaýipsizdik komıteti Shymkent qalasy Ál-Farabı aýdandyq polıtsııa basqarmasynyń bastyǵyna qatysty sotqa deıingi tergep-tekserý júrgizilip jatqanyn rastady. Vedomstvo tarapynan istiń tolyq mán-jaıy jarııa etilmedi.
Buǵan deıin birqatar BAQ-ta aýdandyq polıtsııa basqarmasy basshylarynyń biriniń asa iri kólemde para alý kezinde ustalǵany týraly aqparat taraǵan bolatyn. Atalǵan habarlamalarda Batyr Myrzakeldıevtiń 20 mıllıon teńge kólemindegi parany alý ústinde qolǵa tústi degen aqparat berilgen.
Arnaıy operatsııany UQK-niń sybaılas jemqorlyqqa qarsy qyzmetiniń qyzmetkerleri júrgizgen.
Kazinform agenttiginiń resmı saýalyna jaýap bergen Ulttyq qaýipsizdik komıteti ustalý faktisi men tergeý júrgizilip jatqanyn rastady.
— Atalǵan fakt boıynsha UQK sotqa deıingi tergep-tekserý júrgizip jatyr. Qazaqstan Respýblıkasy Qylmystyq-protsestik kodeksiniń 201-babynyń 1-bóligine sáıkes ózge aqparat jarııa etýge jatpaıdy, — dep habarlady vedomstvodan.
Shymkent qalasy Ál-Farabı aýdandyq polıtsııa basqarmasy bastyǵynyń ustalǵany týraly aqparatty kúdiktiniń advokaty Talǵat Esimov te rastady. Sonymen qatar, qorǵaý tarapy bul jaǵdaıdy arandatý dep baǵalap, onyń qorǵaýyndaǵy azamat kinásin moıyndamaıtynyn málimdedi.
— Advokat Vıktor Krıvonosovpen birlesip, 28 jeltoqsanda UQK departamentiniń sybaılas jemqorlyqqa qarsy qyzmeti qyzmetkerleri ustaǵan Shymkent qalasy Ál-Farabı aýdandyq polıtsııa basqarmasynyń bastyǵy Batyr Myrzakeldıevtiń múddesin qorǵaýǵa kiristik. Bul aqparattyń birjaqty túrde BAQ-ta taralýyna baılanysty qorǵaý tarapynyń ustanymyn jarııalaýdy jón kórdik, — dedi Talǵat Esimov.
Onyń aıtýynsha, Myrzakeldıev para alǵanyn úzildi-kesildi joqqa shyǵarady.
— Biz bul áreketterdi ózge tulǵalardyń qylmystyq jaýapkershilikten jaltarý maqsatynda jasaǵan arandatýy dep esepteımiz. Olarǵa qatysty ister Shymkenttiń basqa aýdandyq polıtsııa basqarmasynda qaralyp jatqan. Para alý týraly sóz bolýy múmkin emes. Barlyq jaǵdaılar tergeý barysynda anyqtalyp, tıisti sheshimin tabady dep senemin, — dedi advokat.
Sonymen qatar, Esimov qorǵaý tarapy tap bolǵan «alaıaqtyqtyń jańa deńgeıi» týraly da aıtty.
— Bul — senimge kirip, polıtsııa bastyǵynan aqsha alyp, keıin ony qaıtarmaý úshin qylmystyq qýdalaý bastaıtyn jańa deńgeı. Odan keıin áleýmettik jeliler arqyly keshe ǵana polıtsııa bastyǵy bolǵan adam qoǵam sanasynda jemqorǵa aınalady. Barlyq mán-jaıdy keıinirek tolyq túsindiremin, — dedi ol.
Buǵan deıin Ulttyq qaýipsizdik komıteti Shymkent qalasy turǵyn úı basqarmasynyń burynǵy basshysy Nurbol Júnisbekovty ustaǵany habarlanǵan bolatyn.