UQK shetelde lańkestik áreketterge qatysý pıǵyly bilinetin adamdarǵa resmı eskertý jasaıtyn bolady
Búgin Parlament Senatynyń jalpy otyrysynda QR Bas prokýrorynyń orynbasary Jaqyp Asanov osylaı málim etti. Eske sala keteıik, Senat otyrysynda «Qazaqstan Respýblıkasynyń keıbir zańnamalyq aktilerine ekstremızmge jáne terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasy talqylanǵan bolatyn.
«Keıbir aǵaıyndarymyz shetelderge baryp lańkestik áreketterge qatysýda. Olardyń osyndaı qadamǵa barýynyń aldyn alý úshin memlekettik qurylymdarǵa eshqandaı ókilettik berilmegen. Sondyqtan da, Ulttyq qaýipsizdik organdary ondaı nıeti bar azamattarǵa shetelge barmaý jóninde resmı túrde eskertý jasaýǵa quqyly bolmaq. Al eskertý oryndalmaǵan bolsa, ondaı azamattardyń qylmystyq jaýapkershiligi aýyrlaı túsedi», - deıdi J. Asanov. Sonymen qatar, Qazaqstanǵa kelip jatqan sheteldiktiń ekstremızm men terrorızmge qatysy bar degen aqparat bolsa, onda olardy elimizge kirgizbeý sharalary qarastyrylyp otyr. Bas prokýror orynbasarynyń sózine qaraǵanda, sońǵy 5 jylda 70-ten astam sheteldik azamattyń radıkaldyq ustanymy tek bizdiń elimizge kirgennen keıin ǵana belgili bolyp, ustalǵan.
Budan bólek, terrorıstik qylmystar úshin sottalyp, jazasyn ótep, bostandyqqa shyqqan adamdardyń barlyǵyna qarjylyq monıtorıng júrgiziledi. «Bul degenimiz, álgindeı bap boıynsha sottalǵan azamattardyń aqshalaı operatsııalary baqylaýǵa alynady degen sóz. Ondaı operatsııalar zańsyz bolsa dereý toqtatylyp, tez arada quqyq qorǵaý organdary tıisti sharalardy qabyldaıtyn bolady», - dedi Jaqyp Asanov.
Sonymen qatar, Bas prokýratýra janyndaǵy Quqyqtyq statıstıka komıteti barlyq ekstremıstik jáne terrorıstik uıymdardyń tizimin júrgizetin bolady. Mundaı aqparattar komıtettiń resmı saıtynda ashyq túrde jarııalanyp, kez kelgen adam úshin qoljetimdi etiledi.
