UQK shekarada 6,9 mlrd teńgeniń deklaratsııalanbaǵan valıýtasyn alyp ótpek bolǵandardy toqtatty
ASTANA. KAZINFORM — UQK Shekara qyzmeti shetelge aqsha qarajatyn zańsyz áketý faktileriniń jolyn kesý boıynsha turaqty jumys júrgizip otyr. Bul týraly UQK baspasóz qyzmeti málim etti.
— Bıyl 2 maýsymda Atyraý oblysy «Qurmanǵazy» ótkizý pýnktinde tekserýden ótý kezinde QR azamatynyń jeke júginen 299,6 myń AQSh dollary tabylǵan. Sonymen qatar, osy jyly 3 maýsymda Jambyl oblysy shekarasynda jasyryn túrde 102,5 mln rýbl ótkizýge árekettengen alty shetel ustaldy, — dep habarlady quzyrly organnan.
Materıaldar protsestik sheshimder qabyldanýy úshin quzyrly organdarǵa berildi. Jalpy jyl basynan beri 6,9 mlrd teńge somasyna deklaratsııalanbaǵan valıýtany áketýdiń 681 áreketi toqtatyldy.
UQK Shekara qyzmeti QR zańnamasynda belgilengen somadan joǵary (10 myń AQSh dollarynan aspaıtyn) qolma-qol aqshany respýblıkadan tys jerge áketýge tyıym salynatynyn eske salady.
Ulttyq qaýipsizdik komıtetiniń Sybaılas jemqorlyqqa qarsy is-qımyl qyzmeti mamyr aıynda 45 adam jemqorlyq boıynsha kúdikti dep tanylǵanyn jarııalaǵan bolatyn.
