UQK shekara qyzmetiniń bas qarjygeri mıllıondaǵan qarjyny qymqyrǵany úshin quryqtaldy
ASTANA. QazAqparat - UQK shekara qyzmetiniń bas qarjygeri mıllıondaǵan qarajatty jymqyrǵany úshin qamaldy.
Bul týraly «Vremıa» gazetiniń búgingi nómirinde T.Kýchýkov «Jıle ı jýle» atty maqalasynda jazady.
Keshe Qazaqstannyń áskerı sotynyń baspasóz qyzmeti 2014 jyldyń 13 aqpanynda Astanada UQK Shekara qyzmeti dırektorynyń orynbasary Serik Áshimbaevtyń qamaýǵa alynǵanyn habarlaǵan. Ekonomıka jáne qarjy salasyna jetekshilik etken polkovnıkke laýazymdy qyzmetin asyra paıdalanyp, shekarashylardy baspanamen qamtýǵa bólingen 300 mln. teńgeni jymqyrdy degen aıyp taǵylyp otyr.
Serik Áshimbaev UQK qyzmetkerleriniń nazaryna ótken jyldyń kókteminde iligipti. Al sáýir aıynda ol qyzmetinen bosatylǵan. Bul qyzmetti Áshimbaev nebári jarty jyl, ıaǵnı, 2012 jyldyń qazanynan 2013 jyldyń sáýir aıyna deıin ǵana atqarǵan. Alaıda, sol az ǵana ýaqyttyń ishinde ol óreskel zańbuzýshylyqtarǵa jol bergen.
Shekara qyzmeti dırektorynyń orynbasaryn tutqynǵa alý birden múmkin bolmaǵan. Ol kezde áskerı tergeýshilerdiń qolynda Áshimbaev pen onyń qolastyndaǵylardyń memleketke keltirgen shyǵyny týraly sarapshylar qorytyndysy bolmaǵan.
Jýyrda ǵana shekara qyzmetiniń joǵary laýazymdy áskerıleriniń shekarashylar úshin páter satyp alýdyń ornyna, astyrtyn áreketterge barǵany anyqtalǵan. Osylaısha respýblıkalyq Ulttyq Qaýipsizdik Komıtetiniń bıýdjetinen 2 mln dollarǵa jýyq qarajatty jemqorlardyń jymqyrǵany anyqtalǵan. Aqmola garnızonynyń áskerı soty Serik Áshimbaevty tutqyndaýǵa sanktsııa berdi.
