UQK Shekara qyzmeti memlekettik shekarany kesip ótý erejelerin túsindirdi
NUR-SULTAN. QazAqparat – QR Ulttyq qaýipsizdik komıtetiniń Shekara qyzmeti karantındik shekteýler kezeńindegi Qazaqstannyń memlekettik shekarasyn kesip ótýdiń qazirgi erejelerin túsindirdi, dep habarlaıdy QazAqparat tilshisi.
Instagram paraqshasynda bul týraly Shekara qyzmetiniń shekaralyq baqylaý departamentiniń ofıtseri Erlan Danııarov aıtty.
«Búgingi tańda COVID-19 pandemııasyna baılanysty memlekettik shekarany kesip ótý ýaqytsha shektelgen. Osyǵan baılanysty Qazaqstan Úkimeti janyndaǵy vedomstvoaralyq komıssııa karantındik shekteýler kezeńinde shekaradan ótý tártibin bekitti. Shekaradan ótýge ruqsat etilgen adamdardyń tizbesi anyqtaldy. Bul rette Qazaqstan azamattary el aýmaǵyna kedergisiz orala alady, al sheteldikter Qazaqstannan kete alady. Shekteýler sondaı-aq dıplomattarǵa, ushaqtardyń, poıyz brıgadalarynyń, teńiz kemeleriniń ekıpajdaryna, júk avtokóliginiń, transshekaralyq qurylystardyń qyzmet kórsetýshi personalyna jáne basqa da adamdar sanattaryna qoldanylmaıdy. Memlekettik shekarany kesip ótýge ruqsat etilgen adamdardyń tolyq tizbesimen UQK saıtynda tanysa alasyzdar», - dedi Erlan Danııarov.
Onyń aıtýynsha, Qazaqstan azamattaryna Ýkraına, Belarýs, Germanııa, Nıderlandy, BAÁ, Ońtústik Koreıa, Túrkııa, al taıaýdan beri Reseı, Ózbekstan, Qyrǵyzstan sııaqty Qazaqstan Úkimetiniń sheshimi boıynsha tikeleı áýe qatynasy jandandyrylǵan shet elderge ketýge ruqsat etiledi.
«Eger halyqaralyq sharttarda ózgeshe tártip qarastyrylmaǵan bolsa vızalyq talaptardy saqtaı otyryp, atalǵan elderdiń azamattary bolyp tabylatyn sheteldikterge de Qazaqstanǵa áýe kóligimen kirýge ruqsat etiledi. Osy jyldyń 3 qyrkúıeginen bastap karantın sharalarynyń álsireýin eskere otyryp, sheteldik azamat Qazaqstanmen áýe qatynasy qaıta jandandyrylǵan elden tikeleı kelýi kerek degen talaptar alynyp tastaldy. Mysaly Germanııa azamaty vızasy bolǵan jaǵdaıda BAÁ-den Qazaqstanǵa tikeleı áýe reısimen qandaı da bir shekteýsiz kele alady. Sonymen qatar qaıta jandandyrylǵan áýe reısterin azamattyǵyna qaramastan karantındik shekteýler kezeńinde memlekettik shekarany kesip ótý tártibine sáıkes kirýge ruqsat berilgen sheteldikterdiń basqa sanattary da (mysaly VAK sheshimi boıynsha otbasy músheleri emdelýge, oqýǵa jáne basqalary) paıdalana alady», - dedi ol.
Erlan Danııarovtyń sózinshe, Bas sanıtarııarlyq dárigerdiń qaýlysyna sáıkes, 6 qazannan bastap sheteldikter Qazaqstanǵa kelgen kezde ózimen birge merzimi 72 saǵattan aspaıtyn PTR-anyqtamalary bolýy qajet. Al Qazaqstan azamattary anyqtama bolmaǵan jaǵdaıda eki táýlikke karantındik statsıonarǵa oqshaýlanady.
Shekara qyzmeti karantındik shekteýler kezinde shekaradan ótý tártibi týraly 8 (7172) 719-111 anyqtama qyzmetiniń nómiri boıynsha táýlik saıyn jumys ýaqytynda telefon arqyly konsýltatsııa beredi.
