UQK Shekara qyzmeti byltyr 75 mlrd teńgeden astam zalaldyń aldyn aldy

ASTANA. KAZINFORM — UQK Shekara qyzmeti 2025 jyly quzyretti memlekettik organdarmen ózara is-qımyl jasaı otyryp, Qazaqstannyń memlekettik shekarasyn qorǵaý men kúzetýdi qamtamasyz etý baǵytynda keshendi sharalar júrgizdi.

Vedomstvo málimetinshe, shekara keńistiginde Qazaqstan Respýblıkasynyń zańnamasyn buzǵan 52 myńnan astam adam jaýapkershilikke tartylǵan.

Sonymen qatar taýarlar men júkterdiń memlekettik shekara arqyly zańsyz ótkizilýiniń 17 541 faktisiniń joly kesildi. Onyń ishinde:

– esirtki zattary boıynsha 344 fakti tirkelip, 1,5 tonnadan astam esirtki tárkilendi;
– qarý men oq-dárilerge qatysty 847 fakti anyqtaldy;
– dinı ádebıetterdiń zańsyz aınalymyna baılanysty 315 fakti tirkeldi;
– janar-jaǵarmaı materıaldaryn zańsyz tasymaldaýdyń 5 900 faktisiniń joly kesildi;
– halyq tutynatyn taýarlarǵa qatysty 8 083 fakti anyqtaldy;
– valıýtalardyń zańsyz qozǵalysyna baılanysty 2 052 fakti tirkeldi.

Kaspıı teńiziniń sý aıdynynda 607 brakonerlik faktiniń joly kesilip, nátıjesinde:

– 226 júzý quraly;
– 580 shaqyrym brakonerlik aýlaý tory;
– bekire tuqymdas balyqtyń 2 376 danasy;
– qara balyqtyń 7 193 danasy;
– 24 ıtbalyq tárkilendi.

Júrgizilgen is-sharalardyń nátıjesinde aldyn alynǵan zalaldyń jalpy somasy 75 mlrd teńgeden asty.

Jyl boıy UQK Shekara qyzmeti Qazaqstan Respýblıkasynyń quqyq qorǵaý organdarymen, sondaı-aq sheteldik seriktestermen tyǵyz ózara is-qımyl jasady. Atap aıtqanda, vedomstvo 48 shekaralyq, 2 vedomstvoaralyq (esirtkiniń zańsyz aınalymyna jáne zańsyz kóshi-qonǵa qarsy is-qımyl baǵytynda) jáne 5 halyqaralyq operatsııaǵa qatysty.

- Halyqaralyq operatsııalar Shanhaı yntymaqtastyq uıymy, Shekara áskerleri qolbasshylarynyń keńesi jáne Kaspıı teńiziniń sý aıdynyndaǵy zańsyz áreketterdi toqtatý sheńberinde ótkizildi, - delingen aqparatta.

Aıta keteıik, UQK destrýktıvti dinı aǵym jaqtaýshylaryn ustady.