UQK Saýd Arabııasynan dinı alaýyzdyqty qozdyrýshy azamatty elge qaıtardy

ASTANA. QazAqparat - 18 aqpanda QR Ulttyq qaýipsizdik komıtetiniń ókilderi Saýd Arabııasynan Qazaqstanǵa respýblıka azamaty A. Abdýjabbarovty qaıtardy. Ol 2015 jyldan bastap, Qylmystyq kodekstiń 174 (dinı alaýyzdyqty qozdyrý) jáne 256 (terrorızmdi nasıhattaý) baptarynda kózdelgen qylmystardy jasady degen kúdikpen halyqaralyq izdeýde bolǵan, dep habarlaıdy QQK-niń baspasóz qyzmeti.

Sotqa deıingi tergeý jumystary sheńberinde oǵan qatysty tutqynda ustaý túrinde bultartpaý sharasy tańdalǵan.

Tergeý aqparaty boıynsha, Abdýjabbarov 2000 jyldary Qazaqstannyń batys oblystarynyń dindarlary arasynda «tákfir» ıdeıasyn taratqan.

Onyń osy teris áreketteri áreketi Aqtóbe, Atyraý jáne Oral qalalarynda jasyryn radıkaldy uıymdardyń paıda bolýyna yqpal etken.

Onyń keıbir izbasarlary tipti elimizde terrorıstik aktsııalardy uıymdastyrý áreketterine qatysqan, keıbiri sodyrlardyń toptaryna qosylý úshin Aýǵanystan men Sırııaǵa ketken.

Abdýjabbarov 2006 jyldan beri Saýd Arabııasynda bolyp, Qazaqstandaǵy musylmandar men shetelde oqyp jatqan stýdentterge yqpal etýin jalǵastyrǵan.

Alaıda, 2015 jyldyń jeltoqsanynda ekstremıstermen baılanysy bar kúdikti retinde Medına qalasynda polıtsııanyń qolyna túsken. 2016 jyldyń qazanynda Túrkııaǵa shyǵarylyp, ol jaqta saıası baspana berýden bas tartylyp, Saýd Arabııasyna qaıtarylǵan.

«Tákfirdi» ustanýshylar aldymen musylmandardy kúpirlik jasady dep aıyptaıtyny belgili. Olar «kápirlerge» qatysty kez-kelgen áreketke, tipti kisi óltirýge de ruqsat etedi.

Osyǵan oraı atalǵan ıdeologııa ıslam áleminde basty qaterlerdińdiń biri retinde qarastyrylady.