UQK: N.Jolamanovtan ony qamaýǵa alýǵa kedergi bolatyn syrqattar tabylmady
ASTANA. QazAqparat - Dárigerler QR Shekara qyzmetiniń burynǵy dırektory Nurlan Jolamanovtan onyń UQK-niń tergeý oqshaýlaǵyshyna qamalýyna kedergi bolatyn syrqattardy tappady, dep habarlady QR UQK baspasóz qyzmetinen.
«Júrgizilgen táýelsiz medıtsınalyq tekserýler nátıjesinde N.A.Jolamanovta onyń tergeý oqshaýlaǵyshyna qamalýyna kedergi bolatyn dertterdiń joq ekeni anyqtaldy. Ol kezdesýge shyǵý, kúndelikti serýendeý, sálemdemeler alý, medıtsınalyq-sanıtarlyq kómekter alý tárizdi múmkindikterde shektelmegen», - delingen habarlamada. UQK málimetteri boıynsha, aǵymdaǵy jyldyń 3 jeltoqsanynda N.A.Jolamanovqa qatysty uıymdasqan qylmystyq toptyń quramynda bolyp, túrli kommertsııalyq qurylym ókilderinen para aldy degen 13 epızod boıynsha qylmystyq istiń tergeýi aıaqtaldy. «Qazirgi ýaqytta Qylmystyq-protsessýaldyq kodekstiń 275-babyna sáıkes aıyptalýshy men onyń qorǵaýshylaryn qylmystyq istiń materıaldarymen tanystyrý júrgizilýde. Sonymen birge olarǵa qylmystyq istiń barlyq materıaldarynyń kóshirmeleri onyń qosymshalarymen tapsyryldy», - dep kórsetilgen habarlamada. Eske sala keteıik, Nurlan Jolamanov 2014 jyldyń 27 qazanynda ustaldy. Aqmola garnızonynyń áskerı soty ony 27 jeltoqsanǵa deıin qamaýǵa alý týraly sheshim shyǵardy.
