UQK memorgandar málimetterin qorǵalatyn júıeni engizbek
ASTANA. QazAqparat - QR Ulttyq qaýipsizdik komıteti qupııa aqparatty qorǵaý maqsatynda memlekettik organdardy tıisti júıemen jabdyqtamaq. Bul týraly QR Qorǵanys jáne aeroǵarysh ónerkásibi mınıstrligi Aqparattyq qaýipsizdik komıtetiniń tóraǵasy Dmıtrıı Golobýrda málim etti, dep habarlaıdy QazAqparat tilshisi.
Parlament Senaty komıtetiniń keńeıtilgen otyrysynda depýtat Talǵat Musabaev mınıstrlikterde, memlekettik organdarda kompıýterler qaýipsizdigin qamtamasyz etý baǵytynda atqarylyp jatqan jobalar týraly surady.
«Mınıstrliktiń ǵylymı-tehnıkalyq keńesimen perspektıvaly 13 joba irikteldi. Qazirgi ýaqytta olar Bilim jáne ǵylym mınıstrliginde saraptamadan ótip jatyr. Olardyń barlyǵy ІT-qaýipsizdikpen baılanysty. 2019-2021 jyldarǵa 2,7 mlrd teńge somasynda qarjylandyrý eskerilgen. Sonymen qatar, naryqta DLP sanatyndaǵy sheshimder bar, ıaǵnı aqparattyń jylystaýyna tosqaýyl qoıýǵa baǵyttalǵan. QR UQK osy sheshimder arqyly bıyl jáne aldaǵy jyldary memlekettik organdardy tıisti júıemen qamtamasyz etýdi josparlap otyr. Bul óz kezeginde tolyqtaı qazaqstandyq ónim bolady», - dedi Dmıtrıı Golobýrda depýtat saýalyna jaýap bere otyryp.
DLP-júıe (Data Leak Prevention) - ol uıymdardan aqparattyń urlanýyna tosqaýyl qoıatyn arnaıy baǵdarlamalyq qorǵanys túri. Atalǵan tehnologııa qupııa aqparattyń túrli arnalardan berilýin buǵattaıdy, sondaı-aq qyzmetkerlerdiń kúndelikti jumysyn baıqaýdyń tetigi bolyp sanalady. Osy arqyly qaýipsizdiktiń osal tustaryn anyqtaýǵa múmkindik beredi.
