UQK «Іle Sý» kásipornynyń basshysyna qatysty tergeý júrgizip jatyr
QONAEV. KAZINFORM — Ulttyq qaýipsizdik komıteti Almaty oblysyndaǵy «Іle Sý» memlekettik kásipornynyń basshysyna qatysty sotqa deıingi tergeý bastalǵanyn rastady.
Buǵan deıin áleýmettik jelilerde UQK Sybaılas jemqorlyqqa qarsy qyzmeti Almaty oblysy Іle aýdany ákimdigine qarasty «Іle Sý» ShJQ MKK basshysy Jandos Jurynovty ustaǵany týraly aqparat taraǵan edi. Ondaǵy málimetterde Jurynovtyń para aldy degen kúdikke ilingeni aıtylǵan.
Osyǵan baılanysty Kazinform agenttigi UQK-ge resmı saýal joldady. Vedomstvo atalǵan laýazymdy tulǵaǵa qatysty sotqa deıingi tergeý júrgizilip jatqanyn málimdedi.
— Qazirgi ýaqytta sotqa deıingi tergeý júrgizilip jatyr. Qazaqstan Respýblıkasy Qylmystyq-protsestik kodeksiniń 201-babynyń 1-bóligine sáıkes ózge aqparat jarııa etilmeıdi, — delingen UQK resmı jaýabynda.
Eske salaıyq, 2024 jyly «Іle Sý» kásipornynda zań buzý derekteri anyqtalǵan edi. Sol kezde áleýmettik jelilerde kásiporyn basshylyǵy ómirde joq adamdarǵa jalaqy tólegeni týraly aqparat tarady.
Keıinirek Almaty oblysy ákimdigi júrgizgen aýdıt bul derekterdi rastady.
