UQK Qýat Aqshabaevqa qatysty tergeý júrgizilip jatqanyn rastady
QONAEV. KAZINFORM – Almaty oblysy Іle aýdany ákiminiń burynǵy orynbasary Qýat Aqshabaevqa qatysty sotqa deıingi tergeý bastaldy. Bul aqparatty Ulttyq qaýipsizdik komıteti rastady.
Áleýmettik jelide buǵan deıin Qýat Aqshabaevty UQK Sybaılas jemqorlyqqa qarsy is-qımyl qyzmetiniń qyzmetkerleri ustaǵany týraly aqparat taraǵan edi.
Ulttyq qaýipsizdik komıtetiniń baspasóz qyzmeti Kazinform agenttigi tilshisine bul aqparatty rastady.
– Sotqa deıingi tergeý júrgizilip jatyr. Ózge aqparat Qylmystyq-protsestik kodekstiń 201-baby 1-bóligine sáıkes jarııa etilmeıdi, - delingen jaýapta.
Aıta keteıik, Qýat Aqshabaev Almaty oblysy Іle aýdany ákiminiń orynbasary qyzmetine 2025 jyly aqpan aıynda taǵaıyndalǵan. Ol munyń aldynda Eńbekshiqazaq aýdany ákiminiń orynbasary, Rahat aýyldyq okrýginiń ákimi jáne Esik qalasy ákiminiń orynbasary qyzmetin atqardy.
Almaty oblysy Іle aýdany ákimdigi Kýat Aqshabaevtyń ustalǵanǵa deıin óz erkimen qyzmetinen ketý týraly ótinish bergenin habarlady.
Baspasóz qyzmetiniń málimetinshe, ol aýdan ákiminiń orynbasary laýazymynan bosatylǵan jáne qazirgi tańda bul qyzmetti atqarmaıdy.
— Atalǵan jaǵdaı quqyq qorǵaý organdarynyń quzyretine jatady. Ýákiletti memlekettik organdarmen ózara is-qımyl qoldanystaǵy zańnama aıasynda júzege asyrylyp jatyr, - dep habarlady ákimdik.