UQK kóliktegi polıtsııa qyzmetkeriniń ustalǵanyn rastady
AQTÓBE. KAZINFORM — Qyzmetkerdiń esirtki tasymalyna qatysy bolýy múmkin. Qazir tergeý júrip jatyr.
Jelide taraǵan aqparatqa súıensek, kóliktegi polıtsııa qyzmetkeri Aqtóbe oblysy Qandyaǵash qalasynda ustalǵan. Ol esirtki tasymalyna qatysty is boıynsha kúdikke ilikti. Qylmystyq kodekstiń «Esirtki, psıhotroptyq zattardy, sol tektesterdi ótkizý maqsatynda zańsyz ıemdený, saqtaý, tasymaldaý, olardy jóneltý ne ótkizý» baby boıynsha is qozǵaldy.
— QR Ulttyq qaýipsizdik komıteti suraýyńyzdy qarastyrdy. Sotqa deıingi tergep-tekserý júrgizilip jatqanyn habarlaımyz. Qylmystyq-protsestik kodekstiń 201-babynyń 1-tarmaǵyna sáıkes ózge aqparat jarııa etýge jatpaıdy, — dep jaýap berdi QR UQK bólimshe bastyǵy Oljas Bektenov.
Eger kúdiktiniń qylmystyq isi dáleldense, múlki tárkilenip, 7 jyldan 12 jylǵa deıingi merzimge bas bostandyǵynan aıyrylýy múmkin.
Aıta keteıik, Atyraý — Aqtóbe baǵytyndaǵy poıyzda bıletsiz jolaýshy qaıtys boldy. «Jolaýshylar tasymaly» kompanııasynyń málimetinshe, oqıǵa 2026 jyldyń 13 shildesinde Qandyaǵash — Aqtóbe ýchaskesinde bolǵan.
