UQK qazaqstandyqtardyń jeke derekterin qorǵaıtyn jańa qurylym jasaqtaýy múmkin

ASTANA. KAZINFORM — QR Prezıdentiniń kómekshisi, Kıbersport federatsııasynyń prezıdenti Qýanyshbek Esekeev «Jibek Joly» telearnasynyń «Ýáde» baǵdarlamasyna bergen suhbatynda  eldiń kıberqaýipsizdik júıesin reformalaý qajettigin aıtty. 

— Memleket basshysy kıberqaýipsizdik máselesin óte durys kóterdi. Árıne, derekter qoldy bolǵan kezder tirkeldi. Ony qoǵam kóp talqylady da. 15 mln qoldanýshynyń deregin qoldy qylý degen salmaqty qater. Sol úshin de qurylymdy reformalaý qajet. Birinshiden, aqparattyq qaýipsizdik saıasatyna jaýapty organ bolý kerek. Muny quqyq qorǵaý blogyndaǵy jeke qurylym jasaýy kerek shyǵar, — dedi ol.

Qýanyshbek Esekeev kıberqaýipsizdik salasyndaǵy ıdeologııa men damý strategııasyn ázirleý Úkimettiń, al baqylaý men jaýapkershilik quqyq qorǵaý organdarynyń quzyrynda bolýy kerek dep esepteıdi.

— Ulttyq qaýipsizdik komıtetiniń quramynda derekterdiń qoldy bolýyna tosqaýyl qoıatyn, tyıym salyp, jaýap alýǵa haqyly qurylym bolý kerek. Bul másele tsıfrlandyrýǵa jaýapty mınıstrlikke berilse, jaýap alý quzyreti azamatty sıpatta ǵana bolady. Derekterdiń qoldy bolýy azamattarǵa, memleketke aıtarlyqtaı zııan keltiredi. Sondyqtan da Memleket basshysy bul ispen quqyq qorǵaý organy aınalysý kerektigin basa aıtyp júr, — deıdi Prezıdenttiń kómekshisi.

Buǵan deıin álem boıynsha Apple, Facebook, Google, Telegram jáne keıbir memlekettik aqparat júıelerinde 16 mıllıard derbes derek qoldy bolǵanyn jazǵan edik.