UQK: Qazaqstanda quryqtalǵan radıkaldyq toptar halyqaralyq lańkester yqpalynda bolǵan
ASTANA. QazAqparat - Qazaqstanda jyl basynan beri segiz radıkaldyq top quryqtaldy. Olardyń bir bóligi halyqaralyq sodyrlardyń basshylyǵymen baılanysa otyryp, áreket etken. Bul týraly QR Ulttyq qaýipsizdik komıtetiniń baspasóz qyzmetinen habarlandy.
«2016 jyldyń basynan beri quqyqqa qaıshy áreketterge talpynyp júrgen tórt azamat pen segiz radıkaldy top anyqtalyp, aýyzdyqtaldy. Quryqtalǵan toptyń bir bóligi halyqaralyq terrorıstik uıym sodyrlarynyń basshylyǵymen jáne tikeleı solardyń nusqaýymen áreket etip kelgen», - delingen UQK taratqan baspasóz baıanynda.
Vedomstvo keltirgen málimetterge qaraǵanda, 2016 jyldyń maýsym aıynda Qaraǵandy oblysynda bir-birimen baılanysty radıkaldy tulǵalardan turatyn eki toptyń joly kesildi.
«Bul rette olardyń áreketine jalpy basshylyq pen úılestirý sharalary sheteldegi qazaqstandyq sodyrlar arqyly júzege asqan. Olardyń bir múshesi soǵys bolyp jatqan aımaqqa barýǵa daıyndalyp, keıinnen Qazaqstannyń shekarasyn zańsyz kesip ótpek bolǵan jerinen ustaldy», - dep jazady Interfaks agenttigi Antıterrorıstik ortalyq shtabynyń ókili Sáken Myńbaevtyń sózin keltire otyryp.
Onyń aıtýynsha, atalǵan toptyń músheleri Qazaqstan aýmaǵynda terrorıstik shabýyldar jasaýǵa daıyndalǵan, sonyń ishinde Balqash mańyndaǵy reseılik áskerı bólimdi nysanaǵa almaq bolǵan. Jalpy arnaıy operatsııalar barysynda 8 adam tutqyndalyp, bireýi ustaý barysynda ózin-ózi jaryp jibergen.
«Sonymen qatar, radıkaldar Balqash qalasynyń mańynan, Gúlshat aýylynan jáne Balqash stansasynan 4 jasyryn qoımalar jasaǵan. Onyń biri tipti bir kúdiktiniń ata-anasynyń baqshasynda qazylǵan. Terrorıstiń ata-anasy tipti bul týraly bilmeıtin de, odan kúdiktenbegen de bolyp shyqty. Jasyryn qoımalardan qarý-jaraqtar, oq-dáriler, sonymen birge, qoldan jasalatyn jarylǵysh zattardyń kóp mólsherdegi komponentteri, hımııalyq zattar, metall kesetin zattar alyndy», - delingen baspasóz baıanynda.
UQK málimetterine qaraǵanda, terrorıstik top músheleri adam joq aıdalada ondaı jarylǵysh qurylǵylardyń qýatyn synaqtan da ótkizip kórgen.
«Toptyń músheleri «shahıd beldigi» atalatyn osyndaı jarylǵysh zattyń ekeýin jasap úlgergen. Onyń bireýi ustaý barysynda ózin-ózi jaryp jibergen bolatyn. Al tárkilengen komponentter osyndaı 50-ge tarta jarylǵysh zattardy jasaýǵa jetetin edi. Bizdiń sarapshylarymyzdyń baǵalaýy boıynsha, jarylǵysh zattardyń munshalyqty kólemimen kópqabatty turǵyn úıdi tolyq qırandyǵa aınaldyrýǵa bolady», - dep atap ótti S. Myńbaev.
Eske sala keteıik, aǵymdaǵy jyldyń maýsym aıynda Qaraǵandy oblysynyń Balqash qalasy men Gúlshat aýylynda qoldan jasalǵan jarylǵysh qurylǵyny qoldaný arqyly terrorıstik aktini josparlaǵan radıkaldy toptyń joly kesildi. Ulttyq qaýipsizdik komıtetiniń baspasóz qyzmeti habarlaǵandaı, Gúlshat aýylynda qylmyskerlerdi ustaý barysynda terrorshylardyń bireýi óz-ózin jaryp jiberip, alǵan jaraqattardan kóz jumdy.
Qazaqstan Respýblıkasynyń Qylmystyq kodeksiniń 257-babynyń 1-bólimine, 287-babynyń 5-bólimine sáıkes, 5 lańkeske terrorlyq top quryp, zańsyz jolmen qarý-jaraq, oq-dári, jarylǵysh zattar men qurylǵylar tasymaldady degen aıyp taǵyldy. Qamalǵandardyń úlkeniniń jasy 37-de, kishisi - 26-da. Kúdiktilerdiń barlyǵy - Qaraǵandy oblysynyń týmalary. Lańkestiń toptyń 2016 jyldyń sáýir aıynda qurylǵany málim boldy.
