UQK «Qalqan-2021» oqý-jattyǵýyn bastady
NUR-SULTAN. QazAqparat - 12 sáýirde Ulttyq qaýipsizdik organdary Shekara qyzmetimen qatar, Qarýly Kúshterdiń jáne Іshki ister mınıstrligi Ulttyq ulanynyń bólimsheleri jaýyngerlik (jedel-qyzmettik) ázirliktiń joǵary dárejesine keltirildi, dep habarlaıdy QazAqparat QR UQK baspasóz qyzmetine silteme jasap.
Oqý-jattyǵý Túrkistan, Qyzylorda, Aqtóbe jáne Atyraý oblystarynda ótkizilýde. Negizgi tájirıbelik is-sharalar Mańǵystaý oblysynyń sheginde jergilikti atqarýshy organdardyń qatysýymen ótkiziletin bolady.
Oqý - jattyǵýdyń negizgi maqsaty - jedel-qyzmettik daıyndyq jaǵdaıyn jáne maqsaty boıynsha mindetterdi oryndaý qabiletin tekserý.
Birinshi kezeńde kúsh-qurylymdardy taǵaıyndalǵan aýdanǵa jyldam jetkizý júzege asyryldy. Shekarashylar men kúshtik organdardyń áskerı qyzmetshileriniń turaqty ornalasý oryndarynan myńdaǵan shaqyrym qashyqtyqta ornalasqan bul jerler kópshiligi úshin beıtanys.
Qarýly Kúshter men Ulttyq ulannyń bólimshelerinen bólingen kúsh-quraldar Shekara qyzmetiniń jedel baǵynysyna berildi. Oqý-jattyǵýlar kezeń-kezeńimen ótkizilýde.
