UQK eldegi beınebaqylaý júıesiniń erejelerin jańartty
ASTANA. KAZINFORM — Qazaqstanda Ulttyq beınemonıtorıng júıesiniń jumys tártibine ózgerister engizildi. Jańa erejeler kameralardy júıege qosý, beınejazbalardy saqtaý, beıneni avtomatty túrde taldaý jáne memlekettik organdarǵa málimet berý tártibin retteıdi. Ulttyq qaýipsizdik komıteti tóraǵasynyń 2026 jylǵy 28 qazandaǵy buıryǵy 2027 jylǵy 3 qańtarda kúshine enedi.
Ulttyq beınemonıtorıng júıesi beınelerdi, olarǵa qatysty qosymsha málimetterdi jáne tirkelgen oqıǵalar týraly tsıfrlyq derekterdi jınaýǵa, óńdeýge jáne saqtaýǵa arnalǵan. Onyń jumysy tsıfrlyq ınfraqurylym arqyly qamtamasyz etiledi.
Júıeniń jumysyna úılestirýshi, operator, ákimshi, paıdalanýshylar men abonentter qatysady. Ony ulttyq qaýipsizdik organdary úılestiredi. Operator qyzmetin memlekettik organ nemese memleket úlesi basym kompanııa atqarady. Al ákimshi mindetin Memlekettik tehnıkalyq qyzmet atqarady.
Júıeni arnaýly memlekettik organdar, quqyq qorǵaý organdary, Tótenshe jaǵdaılar mınıstrligi jáne jergilikti atqarýshy organdar paıdalanady.
Kameralar júıege qalaı qosylady?
Beınebaqylaý júıeleri Ulttyq beınemonıtorıng júıesine bekitilgen kestege sáıkes qosylady. Bul rette qosylýy mindetti nysandardyń sanattary eskeriledi.
Jergilikti atqarýshy organdar júıeni paıdalanýshylarmen birlesip, qosylý kestesin jasaıdy. Ony jyl saıyn birinshi toqsan aıaqtalǵanǵa deıin úılestirýshige joldaıdy.
Keste bekitilgen soń abonentterge kameralardy júıege qosý qajettigi týraly habarlama jiberiledi. Tehnıkalyq talaptardy oryndaýǵa alty aıǵa deıin ýaqyt beriledi.
Operator 10 kún ishinde beınebaqylaý júıesiniń ulttyq standartqa sáıkestigin tekseredi. Talaptar oryndalsa, abonentke júıege qosylýǵa ruqsat beriledi. Sodan keıin operator qajetti tehnıkalyq jumystardy júrgizedi.
Júıege qosylǵannan keıin 10 jumys kúni ishinde taraptar tıisti aktige qol qoıady. Qosylǵan kameralar týraly málimet arnaıy tizilimge engiziledi.
Erejede beınebaqylaý júıelerin erikti túrde qosý múmkindigi de qarastyrylǵan.
Beınejazbalar qansha ýaqyt saqtalady?
Jańa talaptarǵa sáıkes, beınejazbalar men olarǵa qatysty qosymsha málimetter 30 táýlik saqtalady. Al qoǵamdyq tártipti buzý belgileri bar oqıǵalar týraly derekterdi saqtaý merzimi — 12 aı.
Júıede kameralardan túsetin beıneni avtomatty túrde taldaıtyn tehnologııalar qoldanylady. Olar beınejazbalardaǵy aqparatty avtomatty túrde óńdeýge múmkindik beredi.
Osy tehnologııa arqyly adamdardy sáıkestendirýge tek Ulttyq beınemonıtorıng júıesiniń platformasynda ruqsat etiledi. Mundaı múmkindik ulttyq qaýipsizdikti qamtamasyz etý jáne qoǵamdyq tártipti saqtaý maqsatynda ǵana paıdalanylýǵa tıis.
Beıneni avtomatty taldaý baǵdarlamalary júıeniń derekterdi óńdeý ortalyqtarynda, sondaı-aq abonentterdegi qosymsha jabdyqtarda jumys isteıdi.
Qosymsha jabdyqty ornatý týraly sheshimdi operator kameralardyń sanyn, baılanys arnalarynyń ótkizý qabiletin jáne beınebaqylaý júıesiniń tehnıkalyq múmkindikterin eskerip qabyldaıdy.
Júıeniń qaýipsizdigine kim jaýap beredi?
Ulttyq beınemonıtorıng júıesiniń táýlik boıy úzdiksiz jumys isteýine operator jaýap beredi.
Ol derekterdiń saqtalýyn qamtamasyz etip, jabdyqtarǵa tehnıkalyq qyzmet kórsetedi. Sondaı-aq Kıberqaýipsizdiktiń ulttyq úılestirý ortalyǵymen ózara baılanys ornatady.
Kıberqaýipsizdikke qatysty oqıǵa anyqtalsa, operator bul týraly atalǵan ortalyqqa jedel habarlaýǵa mindetti.
Júıe ákimshisi paıdalanýshylardyń aqparatqa qol jetkizý quqyǵyn retteıdi, ınfraqurylymnyń jumysyn qadaǵalaıdy jáne kıberqaýipsizdik talaptarynyń saqtalýyn baqylaıdy.
Al paıdalanýshylar aqparattyq qaýipsizdik talaptaryn oryndaýǵa jáne ózderiniń eseptik jazbalaryn úshinshi tulǵalarǵa bermeýge mindetti.
Memlekettik organdar beınejazbalardy qalaı alady?
Jańa erejede memlekettik organdarǵa Ulttyq beınemonıtorıng júıesindegi málimetterdi berý tártibi de belgilengen.
Zańda kózdelgen jaǵdaılarda memlekettik organ qajetti aqparatty alý úshin júıeniń úılestirýshisine suraý joldap, oǵan tsıfrlyq aqparat tasymaldaǵyshty qosa berýi kerek.
Úılestirýshi suraý túskennen keıin 10 jumys kúni ishinde aqparatty berýge zańdy negiz bar-joǵyn tekseredi.
Aqparatty berýge zańdy negiz bolǵan jaǵdaıda suraý operatorǵa joldanady. Operator tıisti málimetterdi memlekettik organǵa beredi.
Al zańdy negiz bolmasa, úılestirýshi bas tartý sebebin túsindirip, jaýap joldaıdy.
Úılestirýshiniń sheshimimen suraýlar men jaýaptardy elektrondy túrde rásimdeýge de bolady.
Ulttyq beınemonıtorıng júıesiniń jańa erejeleri 2027 jylǵy 3 qańtardan bastap qoldanylady.
Eske sala keteıik, buǵan deıin «Qazaqtelekom» kompanııasy Ulttyq beınemonıtorıng júıesiniń operatory bolyp belgilengenin habarlaǵan edik.
