UQK «Dostyq shekarasy – 2022» arnaıy operatsııasynyń qorytyndysyn shyǵardy

ALMATY. QazAqparat – Almatyda Shanhaı yntymaqtastyq uıymyna múshe elderdiń shekaralyq qyzmeti men quzyretti organdary basshylarynyń 9-shy otyrysy ótip jatyr, dep habarlaıdy QazAqparat tilshisi.

Іs-sharaǵa Qazaqstan, Úndistan, Iran, Qytaı, Qyrǵyzstan, Pákistan, Reseı, Tájikstan jáne Ózbekstan shekaralyq qyzmetteriniń ókilderi, Belarýs jáne Mońǵolııa elderinen baqylaýshylar, sonymen qatar ShYU Aımaqtyq terrorızmge qarsy qurylymy men TMD qatysýshy memleketterdiń Shekara áskerleri qolbasshylarynyń keńesi qatysyp jatyr. Keńes barysynda QR Ulttyq qaýipsizdik komıteti tóraǵasynyń orynbasary – Shekara qyzmetiniń dırektory Erlan Aldajumanov «Dostyq shekarasy – 2022» arnaıy shekaralyq operatsııasynyń qorytyndysyn shyǵardy.

«Nátıjeleri óte mańyzdy. Operatsııa barysynda 226 shekara buzýshy ustaldy, belgilengen shekara rejımderi men kóshi-qon zańnamasyn buzýshy 2 myńnan astam adam anyqtaldy, zańsyz aınalymnan 68 atys qarýy, 52 myń oq-dári, 590 keli túrli esirtki men esirtki zattary tárkilendi, 113 kontrabandalyq túrli taýar anyqtaldy. Onyń ishinde 46 keli baǵaly metall, 1 mıllıon AQSh dollarynan astam somaǵa valıýta, dinı sıpattaǵy tyıym salynǵan ádebıetter men baspa ónimderi jáne 146 tonna janar-jaǵarmaı bar», - ol.

Spıkerdiń sózinshe, búgingi otyrysta ShYU qatysýshy elderdiń memlekettik shekaralaryndaǵy jaǵdaılar boıynsha suraqtar qarastyrylady.

«Búgingi otyrysta 2024 jylǵa arnalǵan jumys jospary talqylanady. Sonymen qatar qazirgi tańdaǵy terrorızmmen, qarý jáne esirtki kontrabandasymen, zańsyz kóshi-qonmen baılanysty jáne ózge de qaterler men qaýipterge qarsy is-qımyl boıynsha jalpy sharalar qabyldaıtyn bolamyz», – dedi Erlan Aldajumanov.