UQK burynǵy tóraǵasynyń suhbattaryndaǵy málimetterdi tekserý kerek - Abzal Quspan
Májilis depýtaty Abzal Quspan Bas prokýratýraǵa Ulttyq qaýipsizdik komıtetiniń burynǵy tóraǵasy Amangeldi Shabdarbaev pen «QazAtomÓnerkásip» kompanııasynyń burynǵy basshysy Muhtar Jákishevtiń suhbattarynda aıtylǵan málimetterdi tekserýdi usyndy, dep habarlaıdy Kazinform agenttigi.
«Burynǵy Ulttyq qaýipsizdik komıtetiniń tóraǵasy A.Shabdarbaevtyń ózi birneshe ret ashyq suhbat berdi. Burynǵy tóraǵa, general-leıtenant A.Shabdarbaevtyń sol kezdegi memleket basshylyǵy tarapynan ýran kenishteri kimge, qalaı úlestirilgeni týraly suhbattarda naqty mysaldar bar. Ol kisi ártúrli saıası famılııalardy atap, kimniń qandaı qylmysqa barǵanyn áshkereledi. Jer-qazba baılyqtaryna baılanysty, olardyń zańsyz úılestirilýine tikeleı dálelmen Muhtar Jákishev, taǵy da basqa birqatar azamattyń ashyq suhbattary, málimdemeleri jarııalanyp, onda iri kompanııalarǵa Qazaqstan halqyna tıesili baılyqtyń taratylýy, zańsyz berilý faktileri naqty aıtylǵan. Soǵan qaramastan, quqyq qorǵaý organdary, prokýratýra tarapynan eshqandaı reaktsııa baıqalmaıdy. Birde bir másele kóterilmeıdi», - delingen depýtattyq saýalda.
Zańgerdiń aıtýynsha, Qylmystyq-protsesstik kodekstiń 180-baby osyndaı suhbattarda aıtylǵan derekter sotqa deıingi tergep-tekserýdi bastaýǵa múmkindik beretinin aıtady.
«Joǵaryda attary atalǵan azamattardyń saıası qyzmette bolǵanyn bilemiz, olardyń málimdemeleriniń negizi bar dep esepteýge bolady. Tipti olaı bolmaǵan jaǵdaıdyń ózinde, aqparat QPK 180-babynyń talaptaryna sáıkes, tirkelip sotqa deıingi tergeý jumystary júrgizilip, onyń nátıjesi halyqqa habarlanýy kerek dep bilemin. Sebebi, BAQ-ta jarııalanǵan qylmys týraly aqparattardy STBT-ǵa tirkeý quqyq qorǵaý organdary úshin talqylaýdy qajet etpeıtin, ımperatıvti norma bolyp tabylady. Bas prokýratýra – zańdylyqtyń oryndalýyn qadaǵalaıtyn konstıtýtsııalyq organ retinde, qoǵamda rezonans týdyratyn saıası málimdemelerge der kezinde quqyqtyq baǵa berýi, dálelder men dáıekter jetkilikti bolǵan jaǵdaıda qylmystyq istiń sotqa jetkizilýin qamtamasyz etýi qajet», - dedi Abzal Quspan.
