UQK basshysy Almatyda Shekaralyq qyzmettiń Áskerı keńesi otyrysyn ótkizdi (FOTO)

ASTANA. QazAqparat - Almaty qalasynda Qazaqstan Respýblıkasy UQK Shekara qyzmetiniń Áskerı keńesi ótti, oǵan Ulttyq qaýipsizdik komıtetiniń tóraǵasy Vladımır Jumaqanov qatysty.

QR UQK ShQ baspasóz qyzmetiniń habarlaýynsha, Áskerı keńeske Shekara vedomstvosynyń basshysy polkovnık Darhan Dilmanov tóraǵalyq  etti. Shekara qyzmetiniń 2015 jyldaǵy áskerı-jaýyngerlik qyzmeti, materıaldyq-tehnıkalyq qamtamasyz etý, sondaı-aq quqyq tártibi men áskerı tártipti nyǵaıtý máselesi qaraldy.

Quqyq tártibi men áskerı tártipti nyǵaıtý máselesin taldaý barysynda aıtarlyqtaı ońdy nátıjelerdiń bar ekendigi atalyp ótildi. Myqty áskerı tártipti saqtaý úshin shekara basshysy jumys algorıtmin jasaý týraly tapsyrma berdi. Qazaqstan Respýblıkasynyń Qarýly kúshterinde, basqa da áskerı qurylymdarynda quqyqbuzýshylyqtyń aldyn alýdyń 2016-2018 jyldarǵa arnalǵan biregeı josparyn QR UQK Shekara qyzmetinde júzege asyrý jospary daıyndaldy, onyń maqsaty áskerı qyzmetshilerdiń ómirin jáne densaýlyǵyn saqtaý, áskerı qyzmettiń qaýipsizdigin qastamasyz etý, qylmystyq jáne ákimshilik quqyqbuzýshylyqty, sybaılas jemqorlyq kórinisterin azaıtý, áskerı qyzmetshilerdiń moraldik rýhyn kóterý bolyp tabylady.

Áskerı-jaýyngerlik qyzmettiń nátıjeleri de jaqsarǵan - Memlekettik shekarany buzýshylardy ustaý byltyrǵy jylmen salystyrǵanda 6,7% artty. Qyzmettik ıtterdiń kómegimen esirtkilik zattardy anyqtaýdyń sany 28,6% jáne salmaǵy boıynsha 8,2 ese ósti. Kontrabandany tárkileý aýqymy ulǵaıdy. Brakonerliktiń jolyn kesý jáne Qazaqstannyń bıoresýrstaryn qorǵaý maqsatynda 126 júzý quraldary ustaldy, byltyrǵy jylmen salystyrǵanda 10% artyq, 1120 shaqyrymǵa jýyq aýlaý quraldary, 33 tonna bekire tuqymdas balyq tárkilendi. Kaspıı teńizinde júzý quraldaryn ustaý kezinde qarý qoldaný 5 esege deıin azaıdy. 

Memleket qaýipsizdigin qamtamasyz etý úshin áskerdi ınjenerlik-tehnıkalyq jaǵynan qamtamasyz etý jalǵasýda. 2015 jyly MI-8 tikushaǵyn jóndeý-qalpyna keltirý jumystary júrgizildi, otandyq shyǵarylymdaǵy kater paıdalanýǵa berildi. 

Shekara qyzmetiniń áskerı-jaýyngerlik is-áreketin qorytyndylaı kele, basshylyq memlekettik shekarany damytý men odan ári jaılastyrý baǵytynda birqatar naqtylaı tapsyrmalar belgiledi.

«Bizdiń qyzmetimizdi odan ári damytýǵa baǵyttalǵan áńgime ótkizildi dep sanaımyn, - dep atap ótti polkovnık Darhan Dilmanov, - máselelerdiń anyq-qanyǵyn pysyqtadyq, óıtkeni áskerı-jaýyngerlik qyzmet barysy, áskerı tártiptiń deńgeıi, qarý-jaraq pen tehnıkalardyń jaǵdaıy osyǵan baılanysty». 

Áskerı keńes barysynda úzdik nátıjelerge qol jetkizgender atalyp ótildi. Jyl shekarashysy bolyp «Ońtústik» óńirlik basqarmasynyń 2038 áskerı bóliminiń «Kordaı» baqylaý-ótkizý beketiniń áskerı qyzmetshisi efreıtor Maksım Sıdorov tanyldy.

Sondaı-aq, shekaralyq baqylaý, teńiz dıvızıony, avıatsııalyq bólim, tyl jáne tehnıkalyq bólim, oqý dıvızıony úzdikter qatarynda ataldy.