UQK Atyraý qalasy ákiminiń orynbasaryna qatysty tergeý júrip jatqanyn rastady
ATYRAÝ. KAZINFORM — Ulttyq qaýipsizdik komıteti Atyraý qalasy ákiminiń orynbasary men «Qalalyq turǵyn úılerdi kommýnaldyq qyzmet kórsetý» JShS bas dırektorynyń orynbasaryna qatysty sotqa deıingi tergep tekserý júrip jatqanyn rastady.
Birneshe kún buryn áleýmettik jelide Atyraý qalasy ákiminiń orynbasary Meıirjan Muqasov pen «Qalalyq turǵyn úılerdi kommýnaldyq qyzmet kórsetý» JShS bas dırektorynyń orynbasary Beıbit Maǵzumov ustaldy degen aqparat tarady. Sonymen qatar qala ákimi Shákir Keıkınniń de jumys ýaqytynda Ulttyq qaýipsizdik komıteti Atyraý oblysy boıynsha departamentine túsinik berýge shaqyrtylǵany aıtyldy. Bul aqparattan keıin advokat Nurlan Jolbolov shahar basshysy men onyń orynbasary quqyq qorǵaý organdarynyń óndirisindegi qylmystyq is boıynsha jaýap alynǵanyn málimdedi.
Soǵan oraı Kazinform tilshisi Ulttyq qaýipsizdik komıtetine saýalhat joldap, bul aqparattyń qanshalyqty rastyǵyn surap kórdi.
— Sotqa deıingi tergep-tekserý júrip jatqanyn habarlaımyz. Ózge aqparat Qylmystyq-protsestik kodekstiń 201-baby 1-tarmaǵyna sáıkes jarııa etýge jatpaıdy, — dep jaýap berdi QR UQK bólimshe bastyǵy O.Bektenov.
Buǵan deıin Shyǵys Qazaqstan oblysynyń qylmystyq ister jónindegi sot alqasynyń tóraǵasy Ábil Bakınniń ustalǵanyn UQK rastaǵan edi.
