UQK Atyraý ákiminiń orynbasary Tilek Mahýovqa qatysty tergeý júrip jatqanyn rastady
ATYRAÝ. KAZINFORM — Ulttyq qaýipsizdik komıteti Atyraý ákiminiń orynbasaryna qatysty sotqa deıingi tergep tekserý júrip jatqanyn rastady.
Birneshe kún buryn áleýmettik jelide Atyraý ákiminiń orynbasary Tilek Mahýov 100 mıllıon teńge para aldy degen kúdikke ilingeni týraly aqparat tarady.
Bul qomaqty qarjy «Atyraý qalasynyń káriz júıelerin kúrdeli jóndeý» jobasyna múddeli kompanııanyń paıdasyna ózgerister engizýge kómekteskeni úshin berilgen degen málimet aıtylyp jatyr.
Kazinform tilshisi Ulttyq qaýipsizdik komıtetine resmı saýalhat joldap, bul aqparattyń ras-ótirigin surap kórdi.
— Sotqa deıingi tergep-tekserý júrip jatqanyn habarlaımyz. Ózge aqparat Qylmystyq-protsestik kodekstiń 201-baby 1-tarmaǵyna sáıkes jarııa etýge jatpaıdy, — dep jaýap berdi QR UQK bólimshe bastyǵy O.Bektenov.
Maýsym aıynda UQK Atyraý ákiminiń orynbasary Meıirjan Muqasovtyń ustalǵanyn, oǵan qatysty tergeý júrip jatqanyn málimdegen edi. Degenmen ákim orynbasary sońǵy kúnderi ákimdiktegi jıyndarda tóbe kórsetip júr.
