UQK atynan alaıaqtar adamdarǵa qońyraý shalyp jatyr: komıtet málimdeme jasady

ASTANA. KAZINFORM – Ulttyq qaýipsizdik komıteti atynan áreket etetin adamdardyń alaıaqtyq faktileri jıi tirkelip jatyr. Osyǵan oraı UQK málimdeme jasady.

Qylmyskerler azamattarǵa UQK jáne basqa da vedomstvolardyń qyzmetkerleri retinde telefon soǵyp, olardyń bank shottarynda kúmándi operatsııalar nemese isti tergeý týraly habarlaıdy.

Jeke jaǵdaılarda alaıaqtar ulttyq qaýipsizdikke degen boljamdy qaýip-qaterdi negizge ala otyryp, terrorızm áreketin toqtatý úshin áreket qajet dep málimdeıdi. Shynaıylyq úshin jalǵan kýálikterdi (mysaly, messendjerdegi beıneqońyraýlar arqyly) kórsetedi nemese UQK logotıpi bar jalǵan qujattardy jiberedi.

Áńgime barysynda olar azamattardy aqshalaryna qaýip tónip turǵanyna sendirip, qorǵanysh nemese tekserý úshin qarajatty qaýipsiz shotqa aýdarýdy usynady. Keıde olarǵa jınaqtaryn qutqarý úshin nesıe alýǵa keńes beriledi. Sodan keıin aqsha qylmyskerler baqylaıtyn shottarǵa aýdarylady.

Sondaı-aq UQK-niń jalǵan qyzmetkerleri jumysqa ornalasýǵa járdemdesý, áleýmettik-turmystyq máselelerdi sheshý úshin jáne t.b. aqshalaı syıaqyǵa óz qyzmetterin usynýy múmkin.

Bul áreketter Qylmystyq kodekstiń 190 (Alaıaqtyq) jáne 385 (Jalǵan qujattardy, mórtabandardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daıyndaý nemese ótkizý) baptaryna jatady.

Osyǵan baılanysty UQK quqyq qorǵaý jáne arnaıy organdar qyzmetkerleri azamattarǵa eshqashan qońyraý shalyp, qandaı da bir shottarǵa aqsha aýdarýdy talap etpeıtinin, sonyń ishinde terrorıstik áreketterdi toqtatý syltaýymen de shaqyrmaıtynyn eske saldy.

– Mundaı qońyraýlar nemese usynystar alynǵan jaǵdaıda polıtsııa organdaryna habarlasý kerek. Azamattarǵa qyraǵylyq tanytý qajet ekendigin eskertemiz, - delingen habarlamada.

Aıta keteıik, Atyraýda 90 jastaǵy zeınetkerdiń 6 mln teńgesin alǵan alaıaq sottaldy.