UQK Aqtaýdaǵy tergeý sotynyń tóraǵasyna qatysty isti rastady
AQTAÝ. KAZINFORM — Ulttyq Qaýipsizdik komıteti Aqtaýdaǵy tergeý sotynyń tóraǵasy Berik Óteevke qatysty resmı jaýap berdi.
— Sotqa deıingi tergep-tekserý júrip jatyr. Qylmystyq-protsestik kodekstiń 201-babynyń 1-tarmaǵyna sáıkes ózge aqparat jarııa etýge jatpaıdy, — delingen resmı jaýapta.
Eske salaıyq, jýyrda jergilikti UQK departamenti Joǵarǵy sottyń ishki qaýipsizdik qyzmetiniń kómegimen mamandandyrylǵan tergeý sotynyń tóraǵasy Berik Óteevke qatysty qylmystyq is tirkegeni týraly aqparat tarady.
Áleýmettik jelilerde ol jeke sebeptermen bir adamǵa qatysty jasyryn tergeý áreketterin zańsyz sanktsııalady degen boljam aıtyldy.
Sondaı-aq, Berik Óteev qamaýǵa alynbaǵan, qazir ol eńbekke jaramsyzdyq demalysynda delingen.
Aıta keteıik, Berik Óteev Aqtaý qalasynyń Mamandandyrylǵan tergeý sotynyń tóraǵasy qyzmetine 2023 jylǵy 26 maýsymda taǵaıyndalǵan.
Onyń eńbek joly quqyq qorǵaý organdarymen tyǵyz baılanysty. Prezıdent janyndaǵy Memlekettik basqarý akademııasyn quqyq magıstri dárejesimen támamdaǵannan keıin, ekonomıkalyq jáne sybaılas jemqorlyq qylmystarymen kúres departamentinde (qarjy polıtsııasy) jumys istegen. Keıin Atyraý oblysy boıynsha Sybaılas jemqorlyqqa qarsy qyzmettiń jedel basqarmasynda ofıtser bolǵan.
Sot júıesine 2020 jyly kelip, eńbek jolyn Mańǵystaý oblysynyń Munaıly aýdanynda bastaǵan.
Buǵan deıin Aqtaý teńiz portynyń burynǵy basshysy sot zalynan bostandyqqa shyqqanyn jazǵanbyz.
